98an hasitako erakusketa, iraganaren eta etorkizunaren artean
Maider Goikoetxeak aurkeztu berri du Maddalen Arte Guneko erakusketa berria: 'Herritik irten gabe'.
Sandra Cuestak jaso du Maddalen Arte Guneko komisariotza aurten. Eugenio Ortizen erakusketarekin abiatu zuen bere komisariotza, eta orain, bigarren erakusketa bat aurkeztu dute, kasu honetan Maider Goikoetxearen Herritik irten gabe. Irekita dago jada, eta maiatzaren 15 arte bisitatu daiteke, ostiraletan (18:00-20:00), larunbatetan (11:00-13:00 eta 18:00-20:00) eta igandetan (11:00-13:00).
“Erakusketa honetako proiektuak ez daude amaituta, eta horrela egin nahi izan dut”, azaldu du Goikoetxeak. Kronologikoki azalduta, 1998. urtean hasi zen erakusketa. “Nire lagun Nerea Bellok liburutxo bat oparitu zidan, nire marrazkiak egiteko: Heidi. Hor hasi nintzen marrazkiak, collageak, argazkiak… denetarik egiten. Liburua ez dago amaitua, eta gainera, ez dut amaitu nahi, beste momentu batean nahiago dudalako egin, beste bizipen berriak ditudanean”, adierazi du artistak. Ezkerreko paretan dago Heidi liburua, orriz orri, bertako irudi guztiak erakutsiz.
Horrez gain, hainbat argazki daude Maddalen Arte Guneko paretan. Denek badute amankomunean zerbait: ura eta itsasoa.Kai Zaharrean hartutako harri eta baldosekin egindako irudiak agertzen dira erdigunean, itsasoan murgilduak. Uraren mugimenduak eta inguruko elementuek paisai eder bat osatzen dute, mugimenduari garrantzia emanez. “Baldosatxoetan irudi batzuk transferitu nituen, eta horiek ur azpian sartzen hasi nintzen”. Jaizkibelgo Kapelaundi hondartzan hasi zen Goikoetxea probak egiten, eta ondoren Kai Zaharrean jarraitu zuen. Egun eguzkitsuak, hodeitsuak, marea behekoak, gorakoak… hainbat baldintza ezberdin probatuz, irudi ezberdinak lortu zituen.
Lotura berezia
Hondarribirekin oso lotuta dagoen erakusketa da. Alde batetik itsasoa, eta bestetik, adibidez, bere amonaren argazkia. “Hemen ondoan bizi izan da nire familia, eta horrek ere ilusio berezia egiten dit. Horregatik jarri nuen nire amonaren argazkia hemen”. Hori ez ezik, Hondarribiko testurak direnak daude atearen ondoan. Kolore ezberdineko baldosak, eta Goikoetxearen esanetan, askoz gehiago direnak.
“Hariak ez du etenik, azaldu du Ortzi Alonso Kultura zinegotziak. “Erakusketa eta aurkezpen honek Maiderren ibilbidea bermatzen du, aurreko mendean hasita eta oraindik amaitu gabe”, esan du zinegotziak. Cuestak ere izan du bere hitzartzea. “Maddalen Arte Gunean egin dugu oraingoan. Harira proiektuaren barne izanda, musikarekin harremana ere izango du erakusketa honek”, esan du komisarioak. Apirilaren 24an 20:00etan kontzertu bat eskainiko du Ane Segurola Saguxar-ek. “Bi artisten arteko plastikotasuna ederra izango zela uste nuen, eta horrela egingo dugu”.
