PSE-EEren ustez Etxebizitza Plana "ez da nahikoa"
Sozialistek bat egiten dute diagnostikoarekin, baina uste dute arazoak konponbide bat behar duela, HAPOa eta eremu tentsionatu izendapena iritsi baino lehen.
PSE-EEk gehiago eskatu dio udal gobernuari etxebizitzaren aferan. Zehazki, Etxebizitza Planari begira egin dizkiete sozialistek proposamenak. Planaren harira egindako diagnostikoarekin bat dator alderdi sozialista, baina adierazi dute “ez dela nahikoa”, eta konponbideak eskatu ditu.
“PSE-EE bat dator diagnostikoarekin, batez ere etxebizitza eskuratzeko egiturazko zailtasunei dagokienez, baita erakundeen arteko lankidetza eta zerga eta gizarte arloko laguntza-neurrien garapena bultzatzeko premiarekin ere. Era berean, bat egiten du etxebizitza-eskatzaileen informazioa eta arreta hobetzeko beharrarekin, baita alokairuko etxebizitzen poltsa indartzearekin eta etxebizitza publikoa, etxebizitza tasatua eta alokairu-erregimeneko etxebizitza sustatzearekin ere”.
Baina desadostasunak ere erakutsi dituzte. “Plana ez da nahikoa zehaztasunari, anbizioari eta gauzatzeko gaitasunari dagokienez”, esan dute sozialistek. Haien ustez Plana HAPOaren eta eremu tentsionatu izendapenaren menpe dago, eta horrek galdera bat sortzen die: “Zer egingo dugu bitartean etxebizitzaren arazoarekin?”.
Etxebizitza Planean adierazten da hutsik dauden etxebizitzak mobilizatzeak potentzial handia izan dezakeela, alokairuko etxebizitzen eskaintza handitzeko. “Azpimarratzen da erroldatuta ez dauden 1680 etxebizitzarekin parke esanguratsu bat dagoela, mobilizatu daitekeena”. Baina sozialistek iragarri dute Eusko Jaurlaritzako Etxebizitza Sailaren 2021eko datuen arabera, Hondarribian 1.621 etxebizitza ez nagusi zeudela, horietatik 173 jenderik gabekoak. “Egoera hori aukera bat bada ere, behar bezala dimentsionatu behar da, eta ahaleginak 173 horiek edo 2026koak mobilizatzera bideratu behar dira. Nekez mobilizatuko dira bigarren egoitzak. Hala zioen IKEIren estudioak”.
“Beharrezkoak”
Hori dela eta, PSE-EEk lehentasunezkotzat jotzen du politika publikoak etxebizitza horien mobilizazio eraginkorrean zentratzea. Horretarako, jabeei informazioa eta laguntza emateko programak sustatzea, udaletako zerga pizgarriak indartzea eta Bizigune programan sartutako etxebizitzetarako OHZren (Ondasun Higiezinen Gaineko Zerga) hobaria %95era arte handitzea beharrezkoa ikusten dute.
Horrenbestez, hurrengoa eskatzen du Hondarribiko PSE-EEk:
1. Hondarribiko Etxebizitza Plana berrikustea, zehaztasun, anbizio eta ahalmen betearazle handiagoz hornitzeko.
2. Aurreko alegazioetan adierazitako neurriak sartzea.
3. Kudeaketa-tresna eraginkorrak sortzea, bereziki etxebizitza-sozietate publiko bat.
