10K lasterketarako dena prest
Bosgarren aldiz egingo dute hamar kilometroko lasterketa, apirilaren 26an. Herrikoia den arren, maila altuko korrikalariak ikusten dira bertan. Azken dortsalak gelditzen dira.
Bosgarren aldiz egingo dute hamar kilometroko lasterketa (10K), apirilaren 26an. Igandean jokatuko da, eta antolatzaileek adierazi dutenez 1.000 partaidetako muga ezarri dute. Izen ematea ireki dago, azkeneko dortsalak lortzeko, oraingoz 940 pertsonek eman dute izena eta, Mikel Leal lasterketaren antolatzaileak adierazi duenez.
Lasterketa herrikoia da, baina maila altuko korrikalariak ikusiko direla aseguratu du antolakuntzak, era berean Euskadiko eta Gipuzkoako txapelketako parte da eta. “Ez da soilik eliteko kirolarientzako proba bat; herritar guztiei irekita dago, bakoitzak bere erritmoan gozatu eta parte hartzeko aukera izan dezan”, adierazi du Angel Gonzalezek, Deportes Gonzalez babeslearen ordezkariak.
Lehenago egin izan duen moduan, udalak kirolarekiko duen konpromisoa erakutsi du Lupe Queiruga zinegotziak. “10K bezalako ekimenek kirola herritarrengana hurbiltzen dute, eta bizimodu osasungarria sustatzeko aukera paregabea eskaintzen dute”. Lasterketaren ibilbidea homologatua dago, eta bihurgune gutxikoa da. Horregatik, marka onak lortzeko erakargarria da korrikalarientzat.
Itzulia
Irteera Minatera kalean izango da, eta handik Portu ingurutik igaro ondoren aireportuko errepidea hartuko du Amuteraino. Bertan bira egin eta Kosta kaletik itzuliko da, Santa Engrazia eta Sabin Arana kaleetatik erdigunera iritsiz. Ondoren, Ramon Iribarren kaletik Kai Berriraino joango da, eta azken zatian espigoian amaituko da. Ibilbide laua da, baina era berean, azkarra.
