Gerrari ezetz esan diote Errepublikaren aldarrikapenean
Nicolas Gerendiain Irungo errepublikarrak urteroko hitzordua egin zuen atzo, eta Errepublikako banderaren igoera ekitaldia egin zuten.
Apirilaren 14a data esanguratsua da: Bigarren Errepubika aldarrikatu zuten eguna. Aurten, 95 urte beteko dira 1931ko apirilaren 14ko hauteskunde libreetan errepublika aldarrikatu zutenetik. Egun horren baitan, Nicolas Gerendiain Irungo errepublikarrak elkarteak urteroko hitzordua egin zuen atzo, hilak 12. Errepublikaren banderaren igoera ekitaldia egin zuten San Juan plazan. Ekitaldian hamarnaka lagun bildu ziren, eta Gloria del Puerto Bidasotik erbesteratuetako baten ilobak bandera igotzeko ardura izan zuen. Bandera atzotik asteazkenera bitarte, hilak 15, egongo da udaletxean.
Irungo Errepublikazaleek argi adierazi zuten gerraren kontra daudela. “Gerrari ezetz diogu”, oihakatu zuten bertan bildutakoek. “Faxismoa berriz hazten ari da, eta gerraren sufrimendua oso nabarmena da Palestinan, Libanon, Iranen eta munduko beste hainbat lekutan. Beldurra, gerra eta gorrotoa hazten ari da”. Errepublikarrek frankismoaren zilegitasun eza salatu zuten, eta herritarron nahia argia dela gaineratu zuten: “Haurrak eta ospitaleak behar ditugu, ez armarik, ez armadarik, ez militar aurrekontu gehiagorik”.
Ekitaldia xumea izan bazen ere, mezua oso adierazkorra izan zen. Errepublikarrekin batera, Cristina Laborda alkatea ere bertan izan zen. Aurreskua dantzatu ondoren, Eusko gudariak, Internatzionala eta Riegoren ereserkia abestu zituzten.
