Nayade abesbatzaren azken lanak musika eta historia uztartuko ditu
'Iraganetik hona' lan berria estreinatuko dute datorren larunbatean, hilak 18, beste hainbat gonbidatu bereziekin batera, Itsas Etxean.
Nayade abesbatzak euren azken lana estreinatuko dute datorren larunbatean, hilak 18, Itsas Etxean. Musika eta historia uztartuko dute Iraganetik hona emanaldian, eta publikoa “kontakizun kolektibo baten parte” izango dela aurreratu dute. Diziplina anitzeko kontzertua izango da, eta Irungo abesbatzarekin batera, Ander Simal piano jotzailea, Maria Jose Noain Maura historialaria eta Hondarribiko Musika Eskolako ikasleak ere izango dira. Emanaldia 18:00tan hasiko da, eta sarrera doakoa izango da gonbidapenarekin.
Emanaldian Hondarribiaren historian zehar bidaiatuko dute, bertako herritarren ahotsetatik abiatuta. “Esperientzia murgiltzailea izango da; izan ere, musika eta hitza elkarrekin uztartuko dira iraganeko une esanguratsuak berpizteko”. Kontzertuak hiru zati izango ditu, XVI. mendetik XXI. mendera bitarte. Noainek zati bakoitzari hasiera emango dio historiako pasarte batekin, alegia, narrazio horrek musikaren eta historiaren arteko zubi-lanak egingo ditu. Narrazioetan, garai bakoitzeko izaera, emozioak eta gizarte-aldaketak islatuko dituzte.
Datorren larunbatean estreinatuko duten proiektu berri honek hiru ardatz izango ditu: musika korala, Nayaderen eskutik; musika instrumentala, Hondarribiko Musika eta Dantzako ikasleen eskutik; eta narratiba historikoa, Noain historialariaren eskutik. “Hiru hizkuntzen arteko elkarrizketa izango da”. Emozioek, soinuek eta Hondarribiaren memoria partekatuak bat egingo dute emanaldi honen bidez.
