"Legea betetzea besterik ez dugu eskatzen"
Berdintasun mahaiko hainbat kidek Berdintasun Planaren inguruan haien hausnarketa plazaratu dute.
II. Berdintasun Plana onartu berri da Hondarribian. Horren harira, adierazpen bateratu bat idatzi dute Juana Mugarrieta elkarteak, Jaizkibel konpainiak, Emeki Emakume Taldeak, Pentsagune Feministak, Marlaxka Xake Elkarteak eta Hondarribiko Bilgune Feministak:
“Legea betetzea besterik ez dugu eskatzen. Berdintasun legea. Euskadiko Legebiltzarrean 2023an onartu zena.
Lege honen babespean sortu zen 2024ko udaberrian Berdintasun Mahaia Hondarribian. Espazio autonomo, feminista eta demokratikoa, zeinak, berdintasun plana gainbegiratzeaz gain, betetzen dela bermatu behar duen ere. Halaber informazio, eztabaida, azterketa, aholku eta proposamen gune gisa hedatzen da.
Berdintasuna gure esperientzia eta betebeharretatik eraiki nahi dugu. Gure herriko Berdintasun Mahaia modu autonomoan eraiki izana legitimoa izateaz gainera beharrezkoa ere bada.
Alardearen gatazka ez da formei buruzko eztabaida hutsa, ez iritzi edo sentsibilitate kontu bat. Emakumeen eskubideen egiturazko zapalketa kasu bat da eta hori ukatzen jarraitzea arduragabekeria politikoa izateaz gain, emakumeenganako diskriminazioa betikotzen du herri honetan. Eskubideak eta iritziak ezin dira eztabaidaren maila berean jarri.
Arrazoi horiengatik guztiengatik:
Erabat gaitzesten dugu EAJ-PNV eta PSE Berdintasun Mahaia deslegitimatzeko egiten ari diren ahalegin oro. Larria baita batetik 2023ko Berdintasun legea haizatzea eta bestetik herrian hain jarrera baztertzailea defendatzea”.
