TAO makina guztiak berritu dituzte
30 makina berritu dira, eta orain mugikorreko aplikazio baten bitartez ordaintzeko aukera izango da.
TAO makina berriak jarri dituzte herri guztian zehar. Lehenago zeudenak “zaharkituak” zeuden, eta beraz, 30 makina aldatu ditu udalak. Orain, funtzio berbera izango dute makinek, baina berritasun ugarirekin. Aldaketa prozesuaren eta hurrengo urtetako mantenuaren gastua 396.642,2 eurokoa izan da. Gaurtik aurrera jarri dira martxan makina berriak.
Iñaki Vielba udaltzain buruak azaldu du makina berriek NFC funtzioa badutela: “ Orain txartela sartu gabe ere ordaindu daiteke, soilik hurbilduz. Horrek denbora murrizteko balioko digu, besteak beste”. Lehengo makinetan arazo nagusia ikusgarritasuna zen, eguzkiarekin pantailak ez ziren garden ikusten eta. Orain aldiz, arazo hori konponduta dago. Lehengo makinek bezala, oraingoak ere panel fotovoltaikoak dituzte.
Igor Enparan alkateak nabarmendu nahi izan du oraingo sistemak aplikazio bidez ordaintzeko aukera ematen duela, eta horrek denborak eta ilarak murriztuko dituela. “Herritarrei haien egunerokoa erraztea funtsezkoa da, eta hori bera lortu dugu makina berri hauekin”, esan du alkateak. Telepark aplikazio sistema beste hainbat herritan ezarri da, eta beraz, horrek ere beste herrietan aparkatzeko erraztasunak emango dizkie hondarribiarrei. “Aplikazioaren bitartez ordainketa egin ahalko da, baina baita ere egoeraren jarraipena, hau da, parkina luzatu ahalko da. Udaletik aplikazioa edukitzeko gomendioa egiten dugu”. Parkin iraupena luzatu ez ezik, ordaindu diren orduak baino gutxiago erabiltzen bada aparkalekua, aplikazioaren bitartez ez erabilitakoa jaso daiteke.
Iaz hasi zen kontratazio prozesua, eta lau urterako hitzarmena sinatu da Dornier enpresarekin, lehiaketa publiko baten ondoren. “Dornierrek berak ekartzen du aplikazioa”, esan du alkateak, beraz, ez da Teleparkekin egindako akordioa, aparkaleku enpresarekin baizik.
