Unai Emeryk bat egin du Hondarribia Arraun Elkartearekin
Hiru urteko babesletza sinatu du futbol entrenatzaileak bere herrikoa arraun elkartearekin. Ilusio handiz begiratzen dute aurrera, emaitza onak lortzeko xedearekin.
Hondarribia Arraun Elkarteak hitzarmen berri bat iragarri du, Unai Emeryrekin sinatutakoa. Entrenatzaile hondarribiarrak, bere EKIPATE BY UE enpresaren bitartez babestuko du arraun elkartea. Hiru urteko akordioa sinatu dute, eta horrenbestez, enpresaren izena Ama Guadalupekoa traineruan ikusi ahalko da. Ilusio handiz agertu dira Emery bera eta Joxemi Elduayen Hondarribia Arraun Elkarteko lehendakaria, aurrera begira erronka berriak borrokatzeko prest.
Hondarribitarra izanez, harreman estua du Emeryk arraunarekin. Baina hori ez ezik, bere osaba Roman Emery traineruaren ordezkari izan zen urte askoz, beraz, gertutik ezagutu duen mundua da. “Gaurkoa oso egun zoriontsua da niretzat eta nire familia osoarentzat”, azaldu du entrenatzaileak, eta hori bera erakutsi du, irribarre handiarekin sinatu baitu hitzarmena.
Elduayen ere pozik agertu da: “Oso akordio garrantzitsua da, gure proiektuarentzat bultzada bat dena zentzu guztietan. Munduko kirol eliteko pertsona batek, Unai den bezala, bere jaioterriko arraun elkartearekin lankidetzan aritzea erabaki izana keinu ederra da”. Harrotasuna aipatu du lehendakariak, bai zuzendari gisa baina baita ere hondarribitar gisa.
Denboraldirako prest
Eusko Label ligan lehiatuko da Hondarribia Arraun Elkarteko gizonezkoen lehen trainerua, eta ETE ligan emakumezkoena. Sailkapen ederrak lortu dituzte aurre denboraldian, eta gogoz hartuko dituzte lehen estropadak, aurreko urteko emaitzak hobetzeko xedearekin.
