Asteburu honetan zaldi lasterketak izango dira Jaitzubia Zaldiketa eskolan
Larunbatean eta igandean, hilak 28 eta 29, 2026ko Zaldi-jauzi IV. Anagan Koparen bigarren fasea jokatuko dute ehunka parte hartzailek.
Euskadiko Hipika Federazioak zaldi-jauzi txapelketa antolatuko du asteburu honetan Jaitzubian. Hain zuzen, larunbat eta igande bitarte, hilak 28 eta 29, IV. Anagan Koparen bigarren fasea jokatuko dute. Bi egunotan ehun parte hartzaile baino gehiago izango dira lehian, eta horien artean Xabier Zabaleta eta Peio Elorduy zaldizko profesionalak izango dira.
Euskal Herritik etorriko dira zaldizko eta amazonak Jaitzubira, baita Kantabriatik eta Errioxatik ere. Lehen mailako zaldizkoez eta amazonez gain, probarik txikienetan nabarmentzen hasi diren zaldizko eta amazona promesek ere parte hartuko dute. Hortaz, proba lehiakorrak eta ikusgarriak izango dira estatu mailako parte hartzaileak biltzen dituen kopa honetan.
Larunbatean, 8:30etik aurrera altuera desberdinetako jauziak egin beharko dituzte, 0,50 metrotik 1,30 metrora. Igandean, Sari Nagusia izango da eta 6.000 euroko sariak banatuko dituzte irabazleen artean. Hori gutxi ez eta, maila bakoitzeko lehen sailkatuek ere opariak izango dituzte.
Parte hartzaileen etorrera errazteko, Txingudi ikastolan eta Urdanibia jauregiaren inguruan ibilgailuentzako aparkalekua jarriko dute.
