Atzerapenak izango ditu HAPOaren onarpenak
Begi onez ikusi du Eusko Jaurlaritzak udal gobernuak egindako proiektua, baina doikuntza teknikoak gehitzea direla eta, gehiago luzatuko da prozesua.
HAPOa azken txanpan sartu da, eta udalak adierazi duenez, aurten aurreikusten dute azken onarpena. Orain, Eusko Jaurlaritzak aurkeztutako proiektua begi onez ikusten duenaren berria jaso du udal gobernuak, baina adierazi dute azken doikuntzak egin beharko direla, eta beraz, aurreikusitako epea luzatu egingo dela.
“Txostenak balorazio positiboak jaso ditu planeamenduaren hainbat alderdi garrantzitsuri buruz, bereziki Udalak proposatutako hiri-ereduari dagokionez”, adierazi du Hondarribiko Udalak ohar bidez. Gogorarazi nahi izan dute HAPOak hirigintza eremu bakoitzean “Babes Publikoko estandarra betetzea lehenesten duela, hirigintza eredu trinkoago eta anitzago bat proposatuz”. Horren harira, Lurralde Antolamenduaren Batzordeak uste du aurkeztutako proiektuak lurzoru okupazioaren eredua betetzen duela, eta bat datorrela Donostialdea-Bidasoa eremukoarekin.
Etxebizitza lurzoruaren kuantifikazioari buruz ere, begi onekoa eman du batzordeak. “Gehienez 1.590 etxebizitza berri eraikitzeko ahalmena aurreikusten da, lurralde-plangintzak ezarritako irizpideekin bat datorren kopurua. HAPOak ezartzen du etxebizitza babestuak libreekin batera gauzatuko direla”, azaldu du udalak.
“Beste arlo batzuetan ere -hala nola hainbat lurralde plan sektorialetara egokitzean, besteak beste ibai eta errekei, hezeguneei, lurzoru agroforestalari edo bizikleta-bideei lotutakoetan-, txostenak adierazten du espedientea bateragarria dela tresna horiekin, eta ez dela oinarrizko eragozpenik planteatzen azpiegiturei eta zerbitzu-sareei dagokienez”.
Ondorioak onak dira, baina badira zuzendu beharreko gauzak. Hainbat ohar eta doikuntza tekniko jaso ditu Hondarribiko Udalak proposatutako HAPOak. Horiek zuzendu beharko ditu prozedurarekin jarraitzeko. “Gai horiek, batez ere, arau-zehaztasunei, sektorekako tresna jakin batzuekin koordinatzeari eta ingurumen- zein ondare-arloko alderdi batzuei buruzkoak dira”.
Udalak adierazi du jada teknikoak lanean daudela doikuntza tekniko horiek betetzen, eta aurreikusten dutenez gehienez hiru hilabeteko epean amaituko dute.
“Gardentasun falta”
Berri hauen harira, EAJk azaldu du udal gobernuak ez duela inongo informaziorik zabaldu beste udal taldeen artean, eta lehenengo komunikabideei bidali diela informazioa. “Azaldutako informazioak xehetasun falta dauka. Doikuntza teknikoak aipatzen dira, baina ez da azaltzen zein diren egin beharreko aldaketak”, adierazi dute jeltzaleek. PSEk ere EAJren ikuspuntu berdina partekatu du.
EAJk eta PSEk uste dute udal gobernuak aipatzen duen parte hartze prozesua eta gardentasuna ez duela betetzen. “Ez da onargarria udal taldeek horrelako informazioa komunikabideen bidetik jasotzea, udal gobernutik beharrean”. Horregatik, jeltzaleek eta sozialistek batzordearen txosten osoa udal talde guztiei bidaltzea eskatu diete udal gobernuko kideei.
