Greba orokorrak jarraipen zabala izan du Irunen
Goizean goiz Gabiria eta Ugalde industria-guneetan piketeak egin dituzte. Denden irekierarekin batera, piketeak Mendibil merkatal-gunera sartu dira eta Ertzaintzak hiru lagun identifikatu ditu.
Greba orokorraren eguna goizean goizetik eragin nabarmena izan du Irunen. 6:00etan hamarnaka lagun Gabiria eta Ugalde industria-guneetan bildu dira piketeak egiteko, eta ohikoa den normalizazioa etetea lortu dute. Goizean zehar auto-karabanak harat honat ibili dira Irunen zehar eta 9:00 pikete informatiboak egin dituzte Mendibil merkatal-gunean. Kalean isiltasuna izan da nagusi, eta Kolon pasealekua erabat hutsik egon da.
Ikasleek ere grebarekin bat egin dute, eta jarraipen zabala izan du ikastetxeetan. Hainbat ikasle Pio Baroja eta Bidasoa institutuetan izan dira piketeak egiten, eta goizean zehar ikasle gutxi batzuk ikastetxeetako atera hurbildu dira, baina ez dira sartu.
Mendibileko denden irekierarekin 40 bat lagun barrura sartu eta kartelak eta informazio-orriak bota dituzte greba orokorra eguna dela aldarrikatzeko. Denda batzuk pertsianak jaitsi dituzte, eta Ertzainak ere bertara sartu dira. Tentsio momentuak izan dira, eta bi lagun identifikatu ditu Ertzaintzak. Mendibilen ordu erdiko elkarretaratzea egin ondoren, Kolon pasealekua zintarekin itxi dute eta bertan kazetari bat identifikatu dute.
Grebak jarraipen handia eduki du goizean Irunen, eta arratsaldean Bidasoko manifestazioa egingo dute Mendelutik, 18:00tatik aurrera.
HITZA greba orokorraren jarraipena egiten ari da, eta egunak aurrera egin ahala informazioa eguneratzen eta gehitzen joango da.
