Greba orokorrak Irungo kaleak hartu ditu
Ehunka pertsona bildu dira Irungo kaleetan, 1500 euroko gutxienezko soldataren aldeko greba orokorraren harira. Sindikatuekin batera, Ernaiko kideak eta pentsiodunak ere bertan izan dira.
Borroka da grebaren oinarria, eta langileak borrokalariak. Milaka pertsonek hartu dituzte gaur Hego Euskal Herriko kaleak, gutxienezko 1500 euroko soldataren alde. Hori izan da premisa nagusia, baina beste hainbat aldarrikapen ere entzun dira. Eguerdian Donostian elkartu dira gipuzkoarrak, eta arratsaldean, eskualdeetako hiriburuetan izan da hitzordua. Bidasoko manifestariak Irunen bildu dira, Zubimuxuko biribilgunean. San Juan plaza izan da helmuga, eta 600 pertsonatik gora izan dira ibilbidean zehar.
Gaur, greba eguna da! oihukatu dute manifestariek. Askok goizetik daramate kalean, piketeak egiten, Donostiako mobilizazioetan parte hartzen, eta orain haien eskualdean haien eskubideak aldarrikatzen. Hiru zutabe nagusi batu dira Irunen. Lehenik, ELA, LAB, Steilas, Hiru eta Etxalde sindikatuek ireki dute bidea, eta atzetik pentsionistek jarraitu diete. Ondoren, Kolon pasealekuan, Ernaiko kideak batu dira. Zahar eta gazte, langile, ikasle eta pentsiodun, denak batera helburu berberarekin.
Gazteen eta pentsiodunen ordezkari banak hartu dute hitza San Juan plazan. “Egunero darabilgun hiztegian krisi hitza ageri zaigu. Krisi ekonomikoa, politikoa, soziala,ekologikoa, zaintza lanena. Mundua hankaz gora jarria du sistemak, joera autoritario eta faxistak hedatuz, gerra inperialistak eraginez, pobrezian eta prekaritatean sakonduz”, esan du gazteen ordezkariak. Argi adierazi dute “aberatsak geroz eta aberatsagoak” direla, eta horrek langileriaren pobrezia eragiten duela.
Pentsiodunek ere, grebarekin bat egin dute, eta haien aldarrikapenak bota dituzte. “40 urtez gogor lan egin ondoren, pentsio duin bat merezi dugu, gutxienez 1500 eurokoa. Ez dugu medikamentuak erostearen eta etxea berotzearen artean erabaki nahi”, adierazi dute pentsiodunek. Argi oihukatu dute: “Gure helburuak lortu arte, borrokan jarraituko dugu!”.
“Borrokan jarraituko dugu”
Bidasoan milaka langilek jo dute gaur grebara, eta horiei denei eskerrak eman nahi izan dizkiete. “Mila esker gaur haien komertzioak itxi eta grebara batu direnei. Zorionak gaur goizean piketeak egin dituztenei eta kaleak hartu ditugunoi”. Langile guztien izenean hitz egin dutela adierazi dute, baita ere greba egiteko aukera ez dutenen izenean. “Langileon eskubideen alde borrokan jarraituko dugu”, gehitu dute amaieran.
“Gora langileon borroka!”
“Gora gazteon borroka!”
“Gora pentsiodunen borroka!”
“Gora gu ta gutarrak!”
Jarraian Imanol Saiz Gomez de Segurak manifestazioaren egin dituen argazkiak, eta bideoak
