50 milioi euroko inbertsioa iragarri dute Bidasoko ESIaren plan integralerako
Eskualdeko Ospitaleko bloke kirurgikoko, Oinaurreko anbulatorioa, Irun Berria osasun zentroa eta Alarde kaleko Lehen Mailako Arreta berrituko dituzte.
Irungo EAJk positibotzat jo ditu Eusko Jaurlaritzako Osasun Sailak hiriko osasun-azpiegiturak berritzeko aurrekontua. Guztira 51,1 milioi euroko inbertsioa aurreikusi dute, eta apustu garbia utzi du 2025-2035 Plan Zuzentzailearen barruan. EAJk argitaratutako prentsa oharrean argi adierazi dute Irungo herritarrei kalitatezko laguntza eskaintzeko eta hobetzeko ezinbestekoa izango dela.
Aurrekontu honek aukera emango du eskualdeko osasun-azpiegiturak hobetzeko. 23 milioi euro Eskualdeko Ospitaleko bloke kirurgikoko obrarako eta ekipamendurako bideratuko dituzte. 1,2 milioi euro Oinaurreko Osasun Zentroa egiteko bideratuko dute (2027. urte amaieran abiatuko dituzte obrak). Eraikin berri honek Belaskoenea, Elitxu-Lapize, Urdanibia, Anaka eta Katea auzoetako 24.700 pertsonari emango die zerbitzua.
Horrela, hiriko hiru osasun-zentroek osasun-zerbitzu handiagoa eta hobea eskaintzeko aukera emango dute. Pediatriako, erizaintzako, emagineko eta ginekologiako hamar kontsulta izango ditu; familia medikuntza eta erizaintzako 27 kontsulta; proba funtzionaletarako lau kontsulta, sendaketa, larrialdi eta erauzketa-gela, eta optometriako lau kontsulta eta kontsulta balioaniztunak.
Bestalde, Alarde kaleko Lehen Mailako Arreta Indartzeko zentroa ere egokituko dute, eta lanek milioi bat euroko aurrekontua izango dute. Azkenik, Irun Berria Osasun Zentroa eraikitzeko 16 milioi euroko aurrekontua aurreikusi dute. Eraikin berri honek erdiguneko eta Dunboako anbulatorioei gehituko zaie eta Bidasoa Institutuaren ondoan kokatuko da.
Bukatzeko, Gorka Alvarez EAJko bozeramaileak argi adierazi du inbertsio hauek hiriaren etorkizunean izango duten garrantzia. “Kontziente gara herritarrak bizitzen ari diren errealitateaz, eta kezka behin baino gehiagotan helarazi diogu Eusko Jaurlaritzako Osasun Sailari. Aldiz, datozen urteetan Irungo gizartearen ongizatean eragina izango duten aurrerapenak ikusten ari gara. Irtenbide desberdinak ezartzen saiatzen ari da, ahalik eta osasun-arreta onena eskaintzeko. Asko dago egiteko eta hauek dira iritsiko diren beste askoren lehen urratsak”.
