Zorionak Antxeta!
25. urteurrenaren ekitaldia egin dute Ficoban. Haien ingurukoekin bildu, eta eskerrak emateko momentua izan zen.
Lagun artean ospatu dituzte 25 urteak. Ficoban egin zuten atzo Antxeta Irratiko kideek mende laurdenaren ospakizuna. Txiki gelditu zen aretoa, eta eserleku gehiago ahalbidetu behar izan zituzten. Bidasoako eta haratagoko jendea hurbildu zen erakustazokara, denek elkarrekin, Antxeta Irratiari eskerrak emateko.
Ficobako areto nagusian, Maddi Sanz arpa jotzaileak ireki zuen ekitaldia. Oholtza gainean egon zen musikaria emanaldi osoan zehar, arpa doinuekin protagonisten ikuskizunak girotzen. Koldo Nausia Antxetako kazetariak egin zituen aurkezle lanak, eta lehen momentuetan Agus Hernan igo zuen oholtzara. Hernan irratiaren hastapenetan egon zen, eta hasiera haiek kontatu zituen. Hernan ez ezik, banaka-banaka igo ziren Antxetako langile guztiak. Azkenean, goian bukatu zuten denek, bertaratutakoen txaloen artean.
Baina ekitaldia bukatu arte, denetarik izan zen oholtzan. Eskualdeko hainbat artistak haien txokoa izan zuten. Hasieratik, Ramon Zabalegi eta Cristina Juaniz, fokuen atzeko aldean, mural bat margotzen aritu ziren. Ekitaldia amaitu arte egon ziren lanean, atzeko planoan. “Flamenkoak diruditen arren, bi antxeta arrosa dira”, azaldu zuen Zabalegik. Jabier Muguruzak hitza ere hartu zuen. Bere lehenengo eleberria kaleratzear du, eta haren aurrerapen bat irakurri zuen. “Lan berri bat izan duenean, beti gurean egon den artista da Jabier. Eskerrak eman nahi izan dizkiogu guregan duen konfiantzagatik”, esan zuen Aitziber Zapirain irratiko koordinatzaileak.
Zirkua, bertsoak… ondo inguratuta egon ziren Antxetako kideak. Haien ingurukoen zorionak ere jaso zituzten, bideo bidez, eta denei eskerrak emanez itxi zuten ekitaldia. 25 urte zuekin hegan leloarekin itxi nahi izan zuten haien egun handia. “Duela mende laurden ideia zaila eta arrotza zena egingarria, zentzuzkoa eta beharrezkoa dela erakutsi dute Antxeta Irratiak bidelagun izan dituen guztiek. Uhinetan, sarean, eta behar den lekuan hegan jarraitzeko indarra ematen duten horiekin, bertze hogeita bost egiteko kuraia soberan dugu. Mila esker zuei. Bada ospatzerik!”, adierazi dute irratiko kideek.
Aurrera begira jarri ziren. “Askok diote irratiak ez duela etorkizunik, baina guk erakutsi dugu hori ez dela horrela”, esan zuen Nausiak. Irratitik harago doa Antxeta gaur egun. Garai berrietara moldatzen, haien egoera onenean daude, eta aurrera jarraitzeko gogoa inoiz baino piztuagoa dute.
Zorionak Antxeta!
Hona hemen HITZAk ateratako argazkiak:
