Datorren astean irekiko dute Solas Jolas udalekuetan izena emateko epea
2016 eta 2021 urteen artean jaiotako haurrek izena eman ahalko dute udalekuetan; aurten ere, bi txanda egingo dituzte.
Udararako hilabeteak falta diren arren, Irungo Euskara zerbitzuak aurtengo Solas Jolas udaleku irekiak aurkeztu ditu. Beste urte batez, 2016 eta 2021 urteen arteko haurrek aukera izango dute udalekuetan parte hartzeko. Haur Hezkuntzako 4 eta 5 urtekoak eta Lehen Hezkuntzako sei mailatako ikasleek, hain zuzen. Izena emateko gutxieneko baldintza batzuk bete beharko dituzte, hala nola, Irunen erroldatuta edota hiriko ikastetxe batean matrikulatuta egotea, eta euskara hutsean edo euskaraz eta erdaraz ikastea.
Josu Iguiñiz Euskara zerbitzuaren ordezkariak udalekuek euskara sustatzeko duten garrantzia nabarmendu du aurkezpenean. “Udako oporretan ere euskaraz aritzera, euskaraz jolastera, lagun arteko harremanak euskaraz izatera eta hizkuntzaren erabilera hobetzera animatu nahi ditut”, gaineratu du. Aurten bi txanda antolatu dituzte: lehenengoa, uztailaren 3tik 30era, eta bigarrena, abuztuaren 4tik 31ra.
Datorren astean, izena emateko epea irekiko dute, eta martxoaren 2tik martxoaren 13ra bitarte aurreizenematea egiteko aukera izango dute, webgune honetan. HAZen, Kateako eta Anakako udal autozerbitzuko terminaletan, Palmera Monteron, Alhondiga Belaskoenean eta San Migeleko Helduentzako eremu sozialean ere aukera izango dute familiek izen ematea bertatik bertara egiteko.
Martxoaren 30ean onartuen behin-behineko zerrendak argitaratuko dituzte, eta apirilaren 15era bitarte, erreklamazioak aurkezteko epea izango dute familiek. Behin betiko zerrendak apirilaren 13an zozketatuko dituzte, 10:00etan. Zozketaren emaitzak egun berean jarriko dituzte Irungo Udal Atarian, 15:00tatik aurrera. Bertan, izen emateko hitzorduak zehaztuko dira, apirilaren 27tik maiatzaren 8ra bitarte egingo direnak. Zalantzak argitzeko irun@euskara.org helbide elektronikoa eta 943 50 51 52 zenbakia jarri dute.
Iaz ere Solas Jolas udaleku irekiak bi txanda izan zituen, eta bertan 574 haurrek parte hartu zuten. Lehenengo txandan, uztailekoan, 507 lagun izan ziren; eta abuztuko txandan, aldiz, 67. Haur horiek guztiek 83 hezitzaileen gidaritzapean izan ziren.
