Behobia eta Artia arteko Gi-636 errepidea, itxita
Bi zuhaitzen mozketa dela eta, Osinbiribileko biribilgunearen eta Behobiako biribilgunearen arteko errepidea moztu dute, eta 16:00ak arte mantenduko dute itxita.
Hilaren 12an haize bortitzaren abisu horia zela eta, Dario de Regoyos kaleko 46. zenbakiaren parean zegoen ezki baten ardatza hautsi zen. Zuhaitz horren erortzeko arriskua saihesteko berehala moztu zuten, eta gainera, udaleko Obra, Mantentze eta Azpiegitura arloak jakinarazi du aldemeneko bi ezkiak ere erortzeko arriskuan daudela. Horregatik, gaur, hilaren 19a, Artia eta Behobia arteko Gi-636 errepidea itxi dute, eta 16:00ak arte errepidea moztuta egongo da.
Bi ezkiak moztu bitartean, trafiko aldaketak izango dira Behobia eta Artia auzoetan. Udalak honako gomendioak helarazi ditu, zirkulazioak ahalik eta eragin gutxien izan dezan. Behobia eta Nafarroarantz doazenak Artiga ibilbidetik eta Dario de Regoyos kaleetatik zeharkatzeko dei egin die. Donostiarantz doazenek, ordea, hiru aukera izango dituzte Gi-636 errepidearen zati hori saihesteko. Behobian, bertan, AP-8ra sartzea; Behobiatik Hendaiara pasatzea eta Gi-636 itzultzea Santiago zubitik edota Zaisa III-tik Blaiako hilerrira igo eta Juan Wolmer kaletik Osinbiribilera jaisteko.
Eskola-umeen garraioan eten ez dadin, udalak neurriak adostu ditu ikastetxeekin. Bestalde, L1 Zaisa-Ospitalea Irunbuseko lineak eraginak izango ditu mozketa iraun bitartean, dagozkion aldaketak www.auif.es webgunean kontsultatu daitezke.
