Txingudi Errugbi Taldearen asteburuko emaitzak, hemen
Biok Txingudik lehia estua izan zuen Hernaniren aurka, baina azkenean, ezin izan zuten garaipena eskuratu; Zaisa Txingudik, aldiz, erraz irabazi zuen Mutrikuren aurka.
Partidaz beteriko asteburua izan dute Txingudi Errugbi taldeko hainbat taldek. Biok Txingudik garaipen zaporea duen porrota izan zuen (7-10). Denboraldiko lehenengo garaipena puri-purian izan zuten, lehia estua izan zuten Hernaniren aurka Plaiaundin. Azken jardunaldietako garapenarekin jarraitu zuten, eta defentsan eta erasoan gogor aritu ziren. Bi taldeek parekotasun handia izan zuten partidaren zati handi batean. Amaierako minutuetan, berriz, Hernani nagusi izan zen azken metroetan, eta garaipena eskuratzea lortu zuten.
Zaisa Txingudik, aldiz, erraz gailendu ziren Mutrikuren aurkako partidan. Garaipen erosoa lortu zuten Mutrikuren aurka, sailkapeneko azken sailkatuen aurka. “Azkar eta indarrez” hasi ziren etxeko jokalariak, eta defentsan sendo jokatu zuten partida osoan zehar. 50-0 markagailua lortu zuten, eta eraginkortasunez aritu ziren partida osoan zehar. Egun, sailkapenean laugarren dira 33 puntu eskuratuta. Sailkapenean aurretik dituen taldeei erritmoa jarraitzen die Zaisa Txingudik.
Gabiria Txingudi/Baztan 18 urtez azpiko taldeak ezin izan garaipena eskuratu La Unicaren aurka. Hasiera parekatuaren ostean, nafarrek beren erritmoa ezarri zuten eta azkenean, 5-43 irabazi zuten. 16 urtez azpiko taldeak, berriz, Arrasaten garaipen garrantzitsua lortu zuen. 12-37 bukatu zuten partida, eta garaipen honen ondorioz, gora egin du ligako sailkapenean. Euskadiko txapelketa jokatzeko aukera ematen duten postuetatik puntu bakar batera kokatuta dago taldea.
Bestalde, Mattin Petrikorena Larraza, 16 urtez azpiko Txingudiko jokalaria, Espainiako 17 urtez azpiko taldearekin egon da. Badajozen eta Valladoliden (Espainia) izan dira jokalariak, eta entrenamenduez gain, Portugalen aurkako lagunartekoa jokatu zuen Txingudiren aurrelariak.
