Pintxo ibilbidea, lehenengoz Irunen
Gaurtik, hilaren 16a, martxoaren 1era bitarte, 30 taberna baino gehiagok parte hartuko dute, eta martxoaren 2an II. Irun Hiria Pintxo Txapelketa egingo dute.
Gastronomiak ere badu tokia irundarren artean, eta ahoa zapore goxoz betetzeko Pintxo Ibilbidea egingo dute, estreinakoz. Gaurtik, astelehenarekin, martxoaren 1era bitarte, 30 taberna baino gehiagok parte hartuko dute. Gaur aurkezpena egin dute, eta bertan Nuria Alzaga alkateordeak pintxoen garrantzia nabarmendu nahi izan du. “Ibilbide hau osatuta, herritarrak inauterien ondoren ere kalera ateratzera eta hiriaz gozatzera animatu nahi ditugu”, gaineratu du. Egitasmo honen bitartez, jardun txikiko garaietan hiria dinamizatu nahi dute, turismo eta tokiko merkataritza ohiko sasoietatik kanpo sustatzen jarraitzeko.
Egitasmoa Irungo Udalak, Irungo Turismo Bulegoak, Gipuzkoako Foru Aldundiak, Bidashop eta Denok Bat elkarteek antolatu dute. Pintxo ibilbidea bakarrik ez, eta martxoaren 2an Irun Hiria Pintxo Txapelketa antolatuko dute, bigarrenez. Antolatzaileek hamabi pintxo aukeratu dituzte txapelketan parte hartzeko, eta egun horretan parte hartzaileek zuzenean prestatuko dituzte. Zuzeneko sukaldaritza saioa 16:00tan hasiko da, eta sari banaketa 19.00etan izango da, epaimahai profesionalak aurtengo irabazlea nor den jakinaraziko du. Sukaldaritza jarduera hau Zabaltza plazan jarriko duten karpa batean egingo dute.
