Sahararen aldeko Euskal Karabanarentzako elikagai bilketa egingo dute
Bihar eta etzi, hilaren 6an eta 7an, produktu ez-galkorrak eta higienikoak jasoko dituzte hiriko BM, Super Amara eta Eroski supermerkatuetan, baita zenbait ikastetxetan.
Euskal Herriak eta Saharak lotura estua dute. Euskal Herritik milaka kilometro bidaiatzen duen Euskal Karabana laster abiatuko da, urtero legez. Bihar eta etzi, hilaren 6an eta 7an, karabana betetzeko eta Tindoufeko kanpamenduetara eramateko elikagaiak bilduko dituzte hiriko BM, Super Amara eta Eroski supermerkatuetan. Irungo zenbait ikastetxek ere produktuen bilketa egingo dute aste osoan zehar, hala nola, Eguzkitza, Txingudi, Toki-Alai, Bidasoa institutua, Belaskoenea eta San Vicente de Paul ikastetxeak. Tadamum elkarteak iragarritako Piztu itxaropena kanpainaren parte izango da bilketa hau, eta produktu ez-galkorrak eta higienikoak izatea eskatu dute.
Tindoufeko kanpamenduetan gehien bat emakumeak eta haurrak bizi dira, eta kanpoko laguntza bakarra dute bizirauteko aukera bakarra. Honekin, errefuxiatu sahararren elikaduraren segurtasuna handitu nahi da. Azukrea, arroza, pasta, babarrunak, dilistak, garbantzuak, hegaluze kontserbak, sardina kontserbak… eta, bestetik, konpresak, pixoihalak jasoko dituzte karabana osatzeko eta behar dituztenei Saharara eramateko. Tadamum elkartearen eskariz, Irungo Udalak mila azukre pakete inguru erosi ditu Tindoufeko kanpamenduetara eramateko.
