EAJk Irun eta Hondarribia Plaiaunditik lotzeko eskatu dio Espainiako Gobernuari
Artiako ubidearen birnaturalizazioa eta Txenpereneako kirol-pistak berreskuratzea bi herriak lotzeko giltzarri direla iritzi dute jeltzaleek.
Plaiaundi Irun eta Hondarribia lotzeko giltzarria izan daitekeela iritzi diote jeltzaleek. Azken egunotan, bi proiektuk ateak ireki dizkiote bi herrien arteko lotura errealitatea bihurtzeko. Artiako ubidearen birnaturalizazioa eta kirol-pistak Txenpereneara mugitzea bide ematen du Plaiaundi eta Amute Irun eta Hondarribia arteko lotura izateko. Oinezkoentzako eta bizikletentzako pasabidea Espainiako Gobernuaren eskumena da, eta jeltzaleek diote obra hauek dakartzaten itxaronaldia dela eta, Irun, Hendaia eta Hondarribia lotzeko konpromisoa luzatzen ari dela.
Herritarren eskakizuna dela diote jeltzaleek, eta azken urtean egindako lanek proiektua bultzatzeko aukera eman dute. Iazko otsailean, Pierre Lotiko tarte berria inauguratu zuten, Juan Thalama Labandibar kaleko azken eraikina eraitsi zuten, EAJk hala eskatuta. Bi obra horiek Irun eta Hendaiaren arteko lotura hobetu zuten. Orain, ordea, erabateko lotura lortzeko Espainiako Gobernuaren lizitazioa falta dute.
Sara Aagenes Espainiako hirugarren presidenteordearen bisita aprobetxatuz, Gorka Alvarezek, Irungo EAJko bozeramaileak, oinezkoen eta txirrindularien loturaren gaineko albiste eza salatu du. “Hiria Hendaiarekin lotuta dago jada eta azken zati hori falta litzateke Txingudiko badiako hiru udalerriak batzen dituen ingurune natural eta pribilegiatu batean bide berde bat izateko”.
Bestalde, Txenpereneako kirol-instalazio berriek Plaiaundiko padura berreskuratzea ahalbidetu dutela dio EAJk. “Bidasoa Atletiko Taldeari eta Txingudi Errugbi Klubari bakoitzak izan ditzakeen kirol diziplina eta proiektuen araberako instalazioak eman behar dizkiegu, hirian bertan, Irunen, garatu ahal izateko”. EAJk jarrera irmoa izan du Txenperenea aurrera eramaten jarraitzeko.
