Odola ematea erraza bezain salbagarria da
Pio Baroja BHIko Batxilergoko bigarren mailako ikasleen giza fisiologiako irakasgaiko proiektuaren barruan, gazteengan odola emateak duen garrantzia landu dute, eta Gipuzkoako Odol Emaileen laguntza izan dute proiektua lantzeko.
Institutuko gimnasioan egin dute odol kanpaina.Gorka Correyero Llamas Odola ematea, bizitzak salbatzea da. Pio Baroja BHIko Batxilergoko bigarren mailako Giza Fisiologia ikasgaiko ikasleek gazteengan odola ematearen garrantziaz kontzientziatzeko odola emateko saioa antolatu zuten astelehenean, hilaren 19an, institutuan bertan. Asier Berrocal Giza Fisiologiako irakasleak gazteek izan duten prestutasuna nabarmendu du.
Proiektu berri batek beti dakar buruhaustea. Hala ere, ez dute lan askorik egin behar izan ikasleek, Gipuzkoako Odol Emaileen elkartearen laguntza izan baitute. Hortaz, ikasleen lana antolakuntzakoa izan dela azaldu du irakasleak. «Ikasleak hiru taldetan banatu dira, bakoitzak zeregin zehatza izan du». Odol kanpainaren berri ematea zen asmoa, eta horretarako, posterrak, triptikoak eta bideoak prestatu dituzte.
Kanpainaren egunean bertan, ikasleak ere bertan aritu ziren xehetasun guztiak kontrolpean izaten. Kanpaina irekia izan da, eta 30 pertsona inguru bildu ziren odola ematera institutuko gimnasioan, 16:30etik 19:30etara. Ikasleekin batera Osakidetzako medikuak eta erizainak izan ziren. «Egun bateko kanpaina berezia izan da gurea, ezohikoa».
Kanpaina egun bakarrekoa izan arren, irakasleak gogorarazi du Irungo anbulatorioetan odola emateko aukera izaten dela. «Gripearen eragina handitu zen, eta horrek Eguberriekin bat egin zuenez, odol erreserbak bukatu egin dira». Edozein odol mota ongi etorria da, baina batez ere, A+, 0+ eta A- odol motetan jarri dute arreta, herritarren %80ak baino gehiagok du odol mota horietako bat.
Odola ematea: guztion lana
Odola ezin da fabrikatu, eta behar duenari eman behar zaio. «Odola ateratzea erraza da, ez da larria», adierazi du Berrocalek. Hori bai, orratzaren fobia duenak arazoak izan ohi ditu. «Normalean 40 urtetik gorako jendea ikusi izan dut odola emateko kanpainetan», gehitu du. 18 eta 40 urte artekoen hutsunea sumatzen du, «kostatzen zaie». Astelehenean lortutako odol kantitatea oso garrantzitsua izan zen, eta argi dute hurrengo urtean ere kanpaina berriz ere egingo dutela.
Denbora oso garrantzitsua izango da hurrengo ikasturteko kanpaina antolatzeko. Aurtengo emaile gehienak ikasleen senideak eta gertukoak izan dira. Deialdia irekia izan da, 18 eta 65 urte bitartekoentzat. «Ikasle askok ezin dute odola ematerik izan, adingabeak baitira», zehaztu du irakasleak. Adingabeak izan arren, proiektuarekin pozik da irakaslea, «ikasleek oso jarrera ona erakutsi dute».
Eguneko balorazioa egiterako garaian kontuan eduki duten faktore nagusiena ordutegia izan da. Aurten arratsaldez egin dute odola emateko saioa, baina irakasleak uste du goizez eginda jende gehiago biltzeko gai izango direla. «Goizean irakasle eta ikasle gehiago daude institutuan», esan du Berrocalek. Orain, ikasleek balorazio-orria bete beharko dute, eta kanpainari buruzko bideo bat egin proiektua ebaluatzeko. «Odolak bizitzak salbatzen ditu».
