Agintaldiaren balorazioa, Abotsanitzen eskutik
Herri batzarraren ustez, erronka handiak daude oraindik aurrean, baina "duela bi urte terdi baino hobe dago Hondarribia"
Agintaldiaren erdia pasata, Abotsanitz herri batzarrak bere balorazioa kaleratu du. Aurreko astean egin zuen udal gobernuak berea, eta ildo beretik jo du herri batzarrak. Agintaldiko neurrien %82a burutu edo burutzeko bidean dagoela berretsi du Abotsanitzek. “Ez da zifra bakan bat: proiektu indartsu baten emaitza da, ibilbide-orri jakin bat duena eta konpromisoak gauzatzen dituen gobernatzeko eredu berri bat”.
157 neurritatik 119 aktibatuta daudela esan du udal taldeak. “Abotsanitzentzat, gobernatzea ez da inprobisatzea edo inertziaz datorrena kudeatzea, baizik eta planifikatu, lehenetsi eta Hondarribiaren etorkizuna eta interes orokorraren baitan erabakiak hartzea”.
Hiru zutabe nagusitan banatu dute proiektu politikoa: publikotasuna sendotzea, pertsonak erdigunean jartzea eta kohesionatuta dagoen herri bat eraikitzea. “Bi urte t ́erdi hauetan, udal administrazioa indartu dugu, justuagoa den sistema-fiskal baterantz goaz eta kudeaketa eraginkor, garden eta interes orokorra lehenesten duen oinarria ezarri dugu”.
Hainbat sailetan egindako aurrerapenak azaldu dituzte, hala nola,”Gizarte Zerbitzuen indartzea, bakardadea gainditzeko programa-komunitarioak, ongizatean hobekuntzak, kirola eta gazterian, bai eta parte-hartze erreal eta herritarrekin elkarrizketa-zuzena oinarri duen gobernantza finkatu ere”.
Etxebizitzaren erronka nabarmendu du herri batzarrak. Haien ustez, erabaki ausarten aldeko apustua egin dute, alokairu sozialeko etxebizitzekin aurrera egin, “herrian bizitzeko eskubidearen aldeko erabakiak hartu”, promotore pribatuekin hondarribiarrentzat “onurakoak izango diren baliabideak negoziatu eta lortu”, besteak beste. HAPOa, aurten onartzekoa dena, hirigintza arloko aurrerapen handiena izango da.
Erronka ugari
Mugikortasunaren harira: Hiri-Autobusaren zerbitzua, bai terrazen zein Aparkalekuen ordenantza praktikara eramatea ere. Abotsanitz: “Lurraldean errotuta dagoen garapen-eredu bat defendatzen dugu ere: Tokiko merkataritza lagundu, auzoak bizirik, txoko guztietara iristen den kultura, euskararen erabilera sustatzeko proiektu eta ekintzak edota bizitza zein ingurunea erdigunean jartzen dituen trantsizio ekologikorako politika publikoak”.
Urte eta erdi dute oraindik aurretik, eta haien ustez, erronka garrantzitsuak daude oraindik. “Gure helburua argia da: Hondarribia solidario, euskaldun eta kohesionatu bat eraikitzea, herritar guztiak zaindu eta kontuan hartzen dituena eta herri-komunitatea interes partikular eta pribatuen gainetik jartzea”.
