Topoaren trenbideen noranzkoan, aldaketa
Hilaren 28 eta 29aren artean emango da aldaketa: egungo kontrako nasa erabili beharko dute erabiltzaileek nahi duten tokirantz doan topoa hartzeko.
Aldaketak topoaren trenbideen noranzkoetan. Aldatu egingo dira. Euskotrenek adierazi duenez, Eusko Trenbide Sareak (ETS) bultzatutako aldaketa da, “gainerako trenbide lineetara egokitzeko”. Hendaia eta Errenteria-Orereta artean hilaren 28tik izango da indarrean aldaketa; hilaren 29an (osteguna) Antxoraino iritsiko da aldaketa. Hau da: Hendaiarako nahiz Donostiarako nasak, tokiz aldatuko dira. Garbiago: gaur egungo joan-etorrietan erabiltzen diren nasaren kontrakotik sartu beharko dute topora erabiltzaileek. Hendaia-Pasaia zatiak 47.500 bidaiari izaten ditu batez beste lanegunetan.
“Nasaren aldaketa hori beharrezkoa da etorkizunean Hendaia-Zarautz tren-lotura egin ahal izateko, Donostiako trenbide-pasantea inauguratu ondoren”, azaldu du ETSk. Izan ere, gaur egun, Hendaia eta Donostia arteko trenak eskuinetik doaz, eta Euskotrenen gainerako sarean, Donostiatik Bilboraino, ezkerretik: “Orain arte, Amarako geltokia izan da noranzko aldaketa hori egiteko gunea, lineak hasi eta amaitzen diren puntua baita. Baina D0nostiako pasantea hurrengo hilabeteetan martxan jartzen denean, ez da halakorik izango; beraz, tren guztiek noranzko berean zirkulatu beharko dute, martxaren noranzkoaren ezkerretara. Aldaketa horrek bidaia-fluxua optimizatuko du, konexio-denbora murriztuko du eta erabiltzaileen esperientzia hobetuko du”.
Adibidez: Irungo Koloneko geltokian, hilaren 28tik aurrera Donostiarantz joateko nasa lehen txarteldegia zegoen eraikina dagoena izango da; edo Errenteria-Oreretakoan, Hendaiarako norabideko topoa hartu nahi duena egun geltokirako tornoak dauden nasatik sartu beharko da trenera. Antxon, nasetara iristeko bidegurutzean, Donostiarantz joateko ezkerrera egin behako dute erabiltzaileek hilaren 29tik, eta eskuinera Irun aldera joateko.
Normala denez, hasierako egunetan erabiltzaileek laguntza beharko dute egoera berrira egokitzeko. Hortaz, Euskotrenek eta ETSk iragarri dute geltokietako arreta zerbitzuak indartuko dituztela.
