Mintzapraktiketarako izen ematea ireki dute
Euskara ikasteko egitasmoan gaurtik aurrera eman daiteke izena. "Parte hartzeko nahikoa da adin nagusikoa izatea eta euskaraz aritzeko gogoa izatea", esan du udalak.
Mintzapraktika egitasmorako izen ematea ireki du Irungo Udalak. Eta euskaraz egiten badugu? lelopean ireki dute izen emate kanpaina, eta euskara praktikatzea eta zaletasunak uztartzea dute xede. Gaur ireki dute izen ematea. “Mintzapraktika paseo bat emanez egin daiteke, edota bizikletan eta mendian dabiltzan bitartean, askok kafe baten bueltan aritzea nahiago izaten dute, eta, beste batzuk, berriz, lanean aritzen direnean. Euskara praktikatzeko ez baitago gogoa besterik behar”, adierazi du Irungo Udalak ohar bidez.
Mintzapraktikaren funtzionamendua oso sinplea da. “Euskara praktikatu nahi duen lagun talde bat haiekin astean ordu betez euskaraz aritzeko prest dagoen pertsona batekin elkartzen da”, azaldu du udalak. Nabarmendu dute azken horiek oso garrantzitsuak direla, eta Irungo euskaltzaleei egitasmora gonbita luzatu diete, horrela, “Irungo euskararen erabilera handitzeko bere aletxoa” jarriz.
Taldeak astean behin gelditzen dira normalki. “Badira bi astean behin gelditzen direnak ere”, adierazi dute. Taldeak osatzerakoan, adina kontuan hartzen dute. “Badira 30 eta 40 urte bitarteko kidez osaturikoak, 40 eta 50 bitartekoenak….”.
Irun euskalduna
Josu Igiñiz euskara ordezkariak aurkeztu du kanpaina: “Euskaltzaleen mugimenduaren baitan Euskal Herri osoan martxan dauden gainerako mintzapraktika egitasmoetan pilatutako esperientzia gehituko dizkio Taupak Irunen orain arte eginiko lanari”. Gainera, gehitu nahi izan du “Irun euskaltzalea dela” eta “orain erakusteko garaia dela”.
Asteroko elkarguneez gain, beste hainbat egitasmo egiteko asmoa dute, hala nola irteerak, txangoak, tailerrak eta topaketak. “Parte hartzeko nahikoa da adin nagusikoa izatea eta euskaraz aritzeko gogoa izatea”.
Parte hartzeko, 688865398 telefonora deituz edo mpirun@taupamugimendua.eus helbidera idatziz eman daiteke izena.
