Zinemazaleek eta itsasozaleek itsaspeko zinemaz gozatzeko aukera izango dute Amaia KZn
Donostiako Nazioarteko Itsaspeko Zinema Zikloa Irunen izango da, eta urtarrilaren 14an, 15ean eta 16an hainbat proiektu aurkeztuko dituzte.
Donostiako Nazioarteko Itsaspeko Zinema Zikloaren 49. edizioa Irunen izango da. Urtarrilaren 14an, 15ean eta 16an itsasoa eta zinema gustuko dutenek aukera izango dute goi mailako proiekzio batzuez gozatzeko, eta itsaspeko biodibertsitatea zientzia fikziorik gabe ezagutzeko. Hiru egun hauetan guztira hamasei film labur eta bost dokumental eskainiko dira Amaia KZn. Proiekzioak 19:00etan hasiko dira, eta sarrera doakoa izango da toki guztiak bete arte.
Nazioarteko Itsaspeko Zinema Zikloa Cimasub elkarteak antolatzen du 1975etik. Irabazi asmorik gabeko elkartearen aurtengo egitasmoa hainbat hiri eta herri bisitatzea da, tartean, Irun. Hainbat jarduera egingo dituzte: itsaspeko zinemaren proiekzioak, ikastetxeetan egiteko jarduera hezigarriak, argazki erakusketak eta emanaldi bereziak adinekoen egoitzetan. Irunen, esaterako, Adinziklo programaren saio bat antolatuko dute Anakako Caser egoitzan, urtarrilaren 16an, adinekoek ere itsaspea ezagutzeko aukera izan dezaten.
