Aurtengo gabonak jendetsuak eta parte hartzaileak izan dira
39 egunetan 117 jarduera gauzatu ahal izan dira aurten, eta antolatutako kultur jardueretan 6.700 pertsona bildu dira.
Gabonetako zuhaitza aurtengo berritasun nagusiena izan da.Irungo Udala Gabonetako kanpaina oso ona izan da aurtengoa. Irun, Gabonetako Izarra lelopean hiria argiz eta jendez beteta egon da eguberrietan. Aurreikuspen guztiak bete dira, eta Cristina Laborda alkatea buru dela balorazio positiboa egin dute aurtengoaz udaleko zinegotziek. Guztira 117 jarduera antolatu dituzte egunotan, eta jarduera askotan sekulako jendetza bildu da. Azaroaren 29tik urtarrilaren 6ra Irungo izarrek dir-dir egin dute egunero.
Urteroko hitzordu nagusiez gain, aurtengo berritasuna gabonetako arbola izan da. Argiak pizteko ekitaldiak, San Tomas egunak, Olentzero eta Mari Domingiren etorrerak eta Errege Magoen ohiko kabalgatak jende ugari bildu ditu Irungo kaleetan. Zabaltza plazako azoka ere aurtengo arrakasta izan da, eta hurrengo urteei begira azoka antolatzen jarraitzeko asmoa dutela ziurtatu dute.
Amaia KZ eta CBA kultur jardueren egoitza izan da. Eguberritako oporren egunetan hemeretzi jarduera antolatu ditu Kultura Sailak bi espazio hauetan. Guztira 6.726 lagun bildu dira jardueratan. Aipatzekoak dira Valeria Rosen bakarrizketa, dantza akademien erakustaldiak eta Urteberriko kontzertua. Sarjia parkeko Gabonetako Herrixkak ere jendetza bildu du, baina azpiegituran izandako aldaketak direla eta ezin izan dute hainbeste jende bildu aldi berean.
Kirolak ere tokia izan du egun hauetan. Gabonetako Krosak errekorra gainditu zuen abenduaren 20an, eta lasterketa baino lehenagoko asteetan dortsal guztiak agortu ziren. Guztira 1.400 parte hartzailek bete zituzten hiriko kaleak.
Gazteek eta adinekoek protagonismo handia izan dute gabonetan. Bi adin tarte hauen parte hartzea inoiz bildutako handiena izan da. Pio XII plazako GazteARTEan gunea erreferentziazko gunea izan da, Martindozenea eta Artiako gaztelekuekin batera. Eskaintza zabaleko jarduera programa antolatu dute, eta guztira 1.200 gaztetxo zein nerabek gozatu ahal izan dute egitarauaz. Adinekoen espazioek 40 jarduera baino gehiago izan dituzte, eta Gabonetan Gogoz programaren bitartez, ariketa fisikoa eta adinekoen arteko harremanak indartu dira. Musika, zinema, antzerkia, mahai jokoak… denetarik izan dute.
Jarduera guzti hauek egun hain berezi hauetan Irun gabonetako helmuga izateko balio izan dute. Alkatearen hitzez, Irun hiri erakargarri eta bizia dela erakusteko aukera ematen digu, eta adin guztietarako askotariko aisialdi-eskaintza zabala izan du.
