Urteari hasiera borobila eman dio Zaisa Txingudik
Mugaldekoek ez diete aukerarik eman Uribealdeari (43-0), eta hasieratik amaierara erritmo altua mantentzea lortu dute.
Zaisa Txingudi eta Uribealdearen aurkako larunbateko norgehiagoka.Txingudi Errugbi Taldea Zaisa Txingudiren bolada ona ez du etenik, eta urteari hasiera ezin hobea eman zion larunbatean. Uribealdekoek ezin izan zuten ezer gutxi egin, eta mugaldekoek garaipen argia lortu zuten, 43-0. Hasieratik ezarritako erritmoak jarraipena izan zuen partida osoan zehar, eta zelaiaren egoera kaxkarrak ez zuen eragin handirik izan taldearen jokoan. Atsedenaldian 19-0 markagailua lortu zuten, eta bigarren zati hasieran erritmoa mantendu eta entseguak laster iritsi ziren.
Garaipen honi esker sailkapeneko hirugarren postuan finkatu da taldean. 24 puntu lortu ditu lehenengo itzulian, eta laugarrenarekin berdinduta dago sailkapenean. Hiru entsegu baino gehiago lortu zutenez, garaipenaren lau puntuez gain, bonus puntu bat lortu zuten.
Akordioa historikoa Donibane-Lohizunerekin
Txingudi Errugbi taldeak eta Donibane Lohizuneko Saint-Jean-de-Luz Olympique taldeak Eskuz Esku proiektuan elkarlanean arituko dira. Proiektu honen bitartez, euskararen erabilera sustatzea, errugbia ulertzeko modu komuna eta kirolaz harago talde bakoitzak bere eskualdeko gazteengan duen eragin soziala bultzatzea izango dira proiektuaren hiru oinarriak. Azken bi urteetan bi taldeek izan dituzten loturak sendotu eta garatu nahi dituzte. Helburu nagusiena hezkuntza eta kulturan oinarritutako lankidetza egituratzea izango da.
Bi taldeetako ordezkariek hitzarmena “historikotzat” jo dute eta beste kirol-eragileentzako erreferentzia izatea espero dute. Miarritze eta Hendaiako taldeekin elkarlana ere indartuko dute. Gaur, hilaren 12an, 19:00etan errugbi klubeko elkartean Biarritz Olympique taldearekin duen akordioa sinatuko du Txingudik. Honen bidez, 16 urtez azpiko taldeek hilean behin batera entrenatuko dute Miarritzen.
Hendaiarekin ere harreman sarea sustatzen jarraituko dute. Emakumezkoen errugbia sustatzeko eta garatzeko proiektu berria lantzen dabiltza bi taldeak. Hendaiako senior mailako Biok Txingudirekin jokatzeko aukera izango dute denboraldi honetan; eta Txingudiko 18 urtez azpiko emakumeek, berriz, Entente de la Nivelle Hendaiako taldearekin jokatu ahalko dute.
