Eguberrietako herrixka ostiralean irekiko dute
Irekiera ekitaldia 18:00etan izango da Sarjia parkean, eta berritasun ugari izango dira herrixkan eguberriak iraun bitartean.
Gaur goizean Nuria Alzaga eta 22 Academy dantza taldeko kideak aurkezpen ekitaldian.Irungo Udala Irungo eguberriak ez dira nolanahikoak. Eguberrietako zuhaitzaren argi eta soinu ikuskizunak harrera bikaina izan zuen, eta Sarjia parkean ere “esperientzia ahaztezina” bihurtu nahi dutela ziurtatu du Nuria Alzaga alkateordeak. Aurten ere, eguberrietako herrixka jarri dute, eta ostiral honetan irekiera ekitaldia izango da 18:00etatik aurrera. Urtarrilaren 5era bitarte jarduera ugari antolatu dituzte parkean.
Gaur goizean, irekiera ekitaldiaren xehetasunak azaldu dituzte. 22 Academy dantza taldeak hasiera emango dio ekitaldiari. San Juan plazatik Uranzu frontoi ondoko Sarjia parkeko sarrerara jaitsiko dira dantzan, eta bertan dantzariek beste hainbat dantza egingo dituzte. Gainera, herrixkan bertan, Ondare kultur elkarteak Disney pertsonaien photocall bat jarriko du, nahi dutenek argazkiak ateratzeko.
Aurreko edizioan bezala, haurrek eskaintza zabala izango dute herrixkan. Bertan, patinatzeko pista, tirolina, tailerrak eta ludoteka instalatuko dira. Berritasun gisa, ludotekak iglu formako egitura estali bat izango du, haurrek momentu atsegin eta erosoak eduki ditzaten. Familiek egindako eskari bati erantzunez, txurroak saltzeko karabana bat jarriko dute.
Ekitaldi guztien egunez eguneko egitaraua, ordutegiak eta bestelako informazioa udalaren webgunean eskuratu daiteke.
