Bolada txarrari amaiera eman nahi dio Zaisa Txingudik
Gizonen taldeak ez du garaipenik lortu azkeneko hiru jardunaldietan, eta igandean egoera iraultzeko aukera izango dute. Emakumeen partida atzeratu egin da.
Bolada txarrean murgilduta da Zaisa Txingudiren gizonezkoen taldea, eta hura eteteko aukera izango du asteburu honetan, Gaztedi B talde gasteiztarraren aurka. Norgehiagoka igandean izango da, 12:00etan, Plaiaundin. Bidasoarrek ez dute garaipena lortzerik izan azkeneko hiru jardunaldietan eta, ondorioz, zazpigarren postura jaitsi dira sailkapenean. Marco Duffreche eta Iñigo Camarerok zuzendutako taldea Liga hasiera oso irregulara izaten ari da, hamaika puntu bildu baitituzte oraingoz, eta hori iraultzeko lanean dihardute buru-belarri, Euskal Ligako postuetatik ahalik eta gertuen amaitzea baita haien helburua. Horretarako, asteburu honetan Gaztedi Bren aurka irabazita, eta hurrengo jardunaldian Lasarte-Orian garaipena lotuta, sailkapenaren goialdean egon nahi baitute beltz eta txuriek.
Emakumeen taldearen partida, berriz, atzeratua izan da.
Harrobiko taldeen partidak
Harrobiko gainontzeko taldeek, berriz, urteko azkeneko partidak jokatuko dituzte asteburuon. Gabiria Txingudi/Baztan sub 18 taldeak etxean, Iruñaren aurka, larunbatean, 16:30ean. Sub 16 taldearen txanda, aldiz, larunbatean eguerdian izango da, 13:45ean, Ordizian. Sub 14en kasuan, Iruñera joan beharko dute, La Unica taldearen aurka jokatzera, larunbatean 10:00etan. Azkenik, Eskolak Arrasateko Mojategi zelaian itxiko du urtea igandean, 10:30ean.
