Larunbatean izango da Euskal Azoka
Liburu salmentaz gain, mahai inguruak eta liburu aurkezpenak ere izango dira. Itsas Etxean izango da, larunbatean zehar.
Bi egun falta dira Euskal Azokak 31. aldiz ateak irekitzeko. Hondarribian jada errotuta dagoen literatura festak berrikuntza ugari aurkeztu ditu aurten. Itsas Etxean egingo dute, urte luzez San Pedro kalean egin ondoren. Egun batekoa izango da soilik, hau da, larunbat goizean hasi eta larunbat arratsaldean bukatuko da. Aurten, argitaletxeak bertan izango dira, zuzenean bertaratutakoei haien lanak saltzen. Gainera, Euskal Jaien egitarauaren barneko egitasmoa da.
Baina liburu salmentaz gain, azoka haratago doa. Euskal Jaien barneko ekitaldia denez, Anton Abadiak bere protagonismoa edukiko du, besteak beste. Hiru mahai inguru antolatu dituzte, azoka funtzionamenduan dagoen bitartean egiteko. “Ez dira mahai inguru sakon edo akademikoak izango”, ohartarazi du Ander Moron Euskara zinegotziak, baina adierazi du gai interesgarriak jorratuko direla. Mahai ingurua 11:00etan egingo da, eta hiru partaide izango dira bertan: Koldo Ortega, Harkaitz Cano eta Antxoka Agirre. Ortega Euskal Jaietaz arituko da. “Euskal Jaien kokatze lana egingo du Koldok, sakonago aztertuz zer izan diren Euskal Jaiak eta zer nolako ibilbidea izan duten”, azaldu du teknikariak. Herrian hainbat ikerketa egindakoa da Ortega, eta haietako bat Euskal Jaien inguruan egin du.
Abadia oinarri
Harkaitz Cano Anton Abadiaz mintzatuko da. Iñigo Sagarzazuk egindako ikerketa izango du oinarri. “Sagarzazu zoritxarrez ja ez dago gure artean, baina haren familiak bere ikerketari garrantzia ematen jarraitzeko hautua egin du. Aurten euskaratu da bere liburua”, esan du Moronek. Abadia ezagutzera eramateko hiru ekintza egin dituzte Euskal Jaien barnean: antzerki bat, Abadaia gaztelura bisita bat eta azokako mahai ingurua. Hori bera izango da Canoren xedea: Abadia ezagutzera eramatea. “Frantziako esfera gorenetan ibilitako pertsona izan zen Abadia, eta jakin nahi dugu zergatik egin zion keinu hura euskarari”. Horretarako, Sagarzazuren lana ezinbestekoa izango da Canorentzat. Azkenik, Agirrek bertsolaritza izango du ardatz. “Agirrek dio Lore Jokoak gaur egungo bertsolaritzaren sorrera izan zirela. Horren ikerketa sakona egindakoa da, eta hortaz hitz egingo du azokan”.
Liburu aurkezpenak ere egingo dira. Hona hemen Euskal Azokaren egitarau osoa:
