EAJk Hondarribiko eremu aberatsenei mesedea egin ziela esan du Abotsanitzek
2017ko HAPOaren arabera, Golfeko eremuan etxebizitza bat eraikitzerakoan 0,54ko koefizientea ordaindu behar da, Kostan baino lau aldiz gutxiago edo Basakon baino hamahiru aldiz gutxiago.
Abotsanitzek salatu du 2017ko HAPOan EAJk “alfonbra gorria” jarri ziela Hondarribiko errenta handienei. Zehazki, eraikitzerakoan ordaindu beharreko lagapenak (hirigintza aprobetxamendua) kobratzerako orduan, herriko hainbat auzoren artean ezberdintasun handia izan dela adierazi du Abotsanitzek. “Hondarribiko auzo ia denetan, familiek normaltasunez beren zergak ordaintzen zuten bitartean, Golfean, Jaizkibel urbanizazioan, errenta altuena dutenek, gutxiago ordaindu dute, EAJren erabakiz”.
Abotsanitzek azaldu du ordainketa hori lurzoruaren balioaren arabera egiten dela, eta normalki, lurzoru horrek zenbat eta gehiago balio, gehiago ordaindu behar dela. “2017ko HAPOan, EAJk irizpide horrekin apurtzea erabaki zuen. Ezetz asmatu zein eremuri mesede egin zioten? Golfeko eremuari, udalerriko errentarik altuenak biltzen dituen auzoari, alegia”, esan du Abotsanitzek.
Hurrengoak izan ziren EAJk lurzoru ezberdinei ezarritako koefizienteak:
- Golfeko eremuan (Jaizkibel urbanizazioa) etxebizitza librea: 0,54 koefizientea
- Babes Ofizialeko Etxebizitza (edozein zonaldetan): 1 koefizientea
- Etxebizitza tasatua (edozein zonaldetan): 2,02 koefizientea
- Kosta auzoan etxebizitza librea: 2,28 koefizientea
- Madalenako Kuboan etxebizitza librea: 3,99 koefizientea
- Basakon etxebizitza librea: 7,44 koefizientea
Koefiziente horiek adierazten dute Golfeko eremuan etxebizitza bat eraikitzeagatik Babes Ofizialeko bat eraikitzeagatik ordainduko liratekeenaren erdia ordaindu behar dela, edota Kostan etxebizitza bat eraikitzerakoan, zergak Golfean baino lau aldiz gehiago ordaindu behar direla. Adibide bat jarri du Abotsanitzek: “Hirigintza-aprobetxamendua kalkulatzeko erabiltzen den formula konplexu bat aplikatuta, Kosta auzoan eraiki berri den 100 metro koadroko etxebizitza libre batek 17.000 euro inguruko lagapena ordaindu beharko luke. Babes Ofizialeko Etxebizitza batek, 5.900 euro inguru. Golfeko eremuan berriz, 100 metro koadroko etxebizitza libre batek 2.600 euro ordainduko lituzke, berez, 31.000 eurotik gora ordaindu beharko lukeenean”.
HAPO berria
Abotsanitzen salatu du herriko errenta handiena dagoen auzoan gutxiago ordaintzen dela, eta hori EAJren erabaki politiko baten ondorioa izan dela. “Eta ingeniaritza fiskal honen emaitza? Udalak bi milioi euro baino gehiago jasotzeari utzi diola 2017tik. Ekipamendu publikoetan inbertsioak edota hobekuntzak egiteko erabil zitekeen dirua, alegia. Baina ez, diru hori ez zen kobratu errenta handiei mesede egiteagatik”.
Gaur egun, HAPO berria garatzen ari dira udal gobernuko kideak. Adierazi dute, bertan “lurzoruaren balio errealaren araberako koefiziente finkatzen” ari direla, “udal-talde teknikoaren azterlan ekonomikoetan oinarrituta”. HAPO berrian 6tik gorako koefizientea ezarriko du Abotsanitzek Golfeko eremuan.
