Palestinarekiko elkartasunak etenik izan ez dezan, mural komunitarioa Larreaundin
Su-etena indarrean bai, baina hala ere palestinarrak hiltzen jarraitzen du Israelek. Larreaundin elkartasunak etenik izan ez dezan murala egingo dute.
Palestinaren eta Israelen arteko “ustezko su etena” adostu zenetik 500 palestinar baino gehiago hil ditu Israelek. Horren harira, Irungo Larreaundi auzoan Palestinarekiko elkartasunak etenik ez duela izan behar uste dute, su etena indarrean bai, baina oraindik ere palestinarrak hiltzen ari direlako han. Hori dela-eta auzoan Palestinako herriaren aldeko murala egingo dute, auzolanean. Larreaundi-Olaberria Auzo Elkartea eta Irun Palestinarekin plataforma dira egitasmoaren bultzatzaile; herritarrei zabalik den egitasmoa dela nabarmendu dute ordea.
Berio kaleko pareta batean egingo dute murala. Hori egikaritzeko lau data ezarri dituzte, hiru auzolanekoak eta laugarrenaren arduradun Pio Barojako ikasleak izango direlarik. Hala, auzoko ikastetxeko ikasleek abenduaren 16ko 08:30ean ekingo diote horma-irudian ekarpena egiteari; aurretik, ordea, lehen auzolanerako deia egin dute auzokideek: hilaren 13ko (larunbata da) 10:00etan hasiko dira pareta prestatzen. 13ko lehen auzolanaren eta ikasleen 16ko partaidetzaren ondotik beste bi data ezarri dituzte murala bukatzeko: abenduaren 18a (osteguna) eta 20a (larunbata), 10:00etan bietan.
Egitasmoaren bultzatzaileek adierazi dute eguraldiaren araberako aldaketak izan daitezkeela planteatutako data horietan. Dena dela, egitasmoarekin bat egin nahi dutenek horma-irudi proiektuaren gainekoak zuzen-zuzenean jakin ditzakete, Whatsapp kanala sortu dutelako denaren berri emateko. Jarraian ikus daitekeen QR kodearen bitartez iritsi daiteke kanal horretara.
