Gazteen marrazkiek Martindozenea gaztelekua koloreztatuko dute
'Hemen ARTISTAK Gara!' erakusketa gaur inauguratuko dute, eta urtarrilaren 7ra bitarte ikusgai egongo da.
Ikasleek egindako marrazkiak. Irungo Udala GazteARTEan programak Hemen ARTISTAK Gara! erakusketa abian jarri du Martindozenea gaztelekuan. Bertan, herriko marrazki akademietako 30 ikasleen marrazkiak ikusgai izango dira, gaurtik, hilaren 5a, urtarrilaren 7ra bitarte. Inaugurazioa gaur arratsaldean izango da gaztelekuan bertan, 17:30ean. Sormen-esperimentazio lan hauen bitartez, ikasle bakoitzak duen talentua eta ahalegina aintzatetsi nahi izan dute.
Erakusketa GazteARTEan Expo proiektutik sortu da, eta tokiko artisten talentua sustatu nahi du. Aurten, 30 parte-hartzaileren lanak bildu ditu erakusketak. 12 eta 17 urte bitarteko ikasleen lanak dira, hainbat formatu eta teknikatan gauzatuak izan direnak. Lanak aurkezteko teknika eta gaia askea izan dira, eta irakasleen laguntzarekin erakusketan aurkezteko formatu egokiena ondu dute.
Sandra Caballero Gazteria ordezkariak erakuseta honen balioa azpimarratu du. “Programa honek gure herriko talentu gaztea ezagutarazteko eta aitortzeko balio izan du. Proiektuak zabaltzen lagundu diegu, etorkizun profesional baterako leihoa zabal dezaten. Obra guztiek bere denbora eta ahalegina dute, eta hori guztia partekatzea aberasgarria da denontzat”.
