Tatapas Gastroteka Espainiako aperitibo onenaren finalera iritsi da
Avilesen lehiatuko dira datorren astean, beste 7 parte hartzaileren aurka. Lehiaketa 101 tabernaren eta jatetxeren artean egin da.
'Geoda Marina' Avilesen (Asturias, Espainia) Espainiako aperitibo onenaren bila dabiltza. Hainbat bozketa izan ondoren, Euskal Herriko ordezkari bakara da Tatapas. Hurrengo astean egingo dute Asturiaseko kostaldeko hirian. Orain arte, El aperitivo perfecto. Campeonato de España webgunean bozkatu dute erabiltzaileek, eta galbahe bat egin ondoren, zortzi parte hartzailek lortu dute finalerako sarrera.
Guztira 101 taberna eta jatetxek hartu dute parte lehiaketan. Esan bezala, bozketa webguneko erabiltzaileek egin dute, Tatapas Gastrotekan haien aperitiboa probatu ondoren. Tatapasko sorkuntza Geoda Marina da. Ganbak baratxuriarekin bezalako klasiko batean oinarritu dute platera. Oinarrian aza morez egindako kurruskari bat du, gurin ketuz margotua, piperbeltz kaienarekin, eta gainean ganaba tartar bat, olio eta piperrauts gatz limaz ondua. Amaitzeko, baratxuri errearen krema, zilantro eta perrexilezko krematsua, baratxuri frijituak, karabinerozko perlak eta laranjarekin egindako gela.
“Ilusio handia”
Gastrotekako kideak poztasun handia erakutsi dute sare sozialen bidez. “Ilusio handia egiten digun albiste bat da. Gainera, Euskal Herriko ordezkari bakarra gara, eta horrek sekulako ilusioa sentiarazten digu, eta, batez ere, esker ona”. Gainera, haiei botoa eman dieten erabiltzaileei zuzendu zaie: “Eskerrik asko Itsas Geoda dastatzera etortzeagatik, zuen botoengatik eta egun hauetako babesagatik. Finalean ikusiko gara gure esku dagoen guztia emanez”.
