Suaren zaindariak omendu dituzte Euskararen Egunean
Euskararen Kriseiluaren itxiera emanaldia egin zuten atzo. Musika, ipuinak eta omenaldiak, arratsalde ederra izan zuten haurrek.
Suaren zaindariek haien egun handia izan zuten atzo. Euskararen Kriseilua egitasmoan parte hartu zuten hainbat familia Itsas Etxean elkartu ziren. Euskararen sua 138 ikasleren etxean izan da, eta ahaide guztien artean zaintzeko aukeraz disfrutatu dute. “Umeak dira Euskararen Kriseiluaren protagonistak, eta hori da egitasmo honen oinarri handienetarikoa”, azaldu du Maite Agirre Euskararen Kriseiluaren koordinatzaileak. Euskararen erabilera etxe barruan sustatzea du helburu proiektuak, sua pizten denean, euskaraz hitz egiteko edo saiakera egiteko konpromisoa hartu baitute familiek.
Baina kriseiluak eskoletara itzuli dira, eta atzo izan zuten egitasmoaren azken eguna, Euskararen Egunarekin batera. Musikaz bete zuten Itsas Etxea. Hasteko, Pettik, Lorea Zulaikak eta Hodei Eceizak Et Incarnatus Orkestrarekin bat egin zuten, Sorotan Beleren bi kanta eskaintzeko. Ondoren, Ameli ipuin kontalari bikoteak auditoriumeko txiki guztien arreta jaso zuten. Musika eta ipuinak uztartu zituzten, giro polit bat sortuz.
Baina momentu gorenena haurrak oholtza gainera igo zirenean izan zen. Bertan, suaren zaindari tituluak banatu zituzten, domina banarekin batera. Haur bakoitzak bere errekonozimendua jaso zuen, sua zaintzeagatik eta euskara sustatzeagatik. Azkenik, Stoldak taldeko Eceizak eta Koldo Emeryk eskolekin batera egindako abestia kantatu zuten, haur guztiekin batera. Egiluze, Ama Guadalupe eta Talaia eskoletan aritu dira Eceiza eta Emery azken egunetan, haiek egindako kanta zabaltzen.
Hona hemen atzo HITZAk egindako argazki eta bideoak:
