Gabonetako oparia herrian erosi dezaten
Gabonetako Merkatua egingo dute hurrengo asteburuan, abenduaren 13tik 14ra bitarte. 17 salmenta postu jarriko dira, herriko sortzaile eta artisauak barne.
Gabonetako merkatua egingo dute hurrengo asteburuan. Herriko sortzaileek Santa Maria Madalena plaza hartuko dute, urtean zehar egindako lanak aurkezteko, eta saltzeko. Abenduaren 13an eta 14an egingo dute. “Gabonetan ere bihotzarekin erosi, bertan kontsumitu. Hori da aurtengo azokaren leloa”, esan du Estitxu Urtizberea Merkataritza zinegotziak. 17 postu jarriko dituzte aurten.
Azokak hainbat kokaleku izan ditu bere ibilbidean, baina azken urteetan Portua auzoko plazan finkatu da. Jada errotuta dagoen azoka da negukoa, udarakoaren moduan. Herriko sortzaileak eta artisauak izango dira bertan, eta dena girotzeko zuzeneko musikaz gozatuko dute bertaratutakoek. “Herriko sortzaileen lana balioan jartzeko egitasmoa da hau”, azaldu du Urtizbereak. Gabonetako opari bereziak egiteko leku aproposa da azoka zinegotziaren ustez.
Judas Arrieta bertan egongo da, sortzaile moduan, eta argi dauka “aukera oso polita” dela haientzat. Jende asko hurbiltzen da, eta gure urteko lanak erakusteko aukera paregabea da. Arrietak esan du, horrelako egitasmoetan berak prezioak jaisten dituela, normalki kanpoan saltzen duelako bere lana, eta herrian egitea berezia delako. “Sortzaileen artean elkartzea ezinbestekoa da, besteak zertan dabiltzan ikusteko, eta denon artean urteko balantzea egiteko”.
Ehungintza, zeramika, altzairuak, ilustrazioak, arropa, kaligrafia… eskaintza anitza izango du azokak. Baina postuez gain beste hainbat gauza antolatu dituzte. Haurrei zuzendutako tailerrak eta txokolatada programazioaren barruan daude, etxeko txikienei zuzenduak. Azoka doakoa izango da, baina plaza kopuru mugatuak izango ditu.
Merkatuan egongo diren postuak:
- Artkham Creations
- AG Caligrafía
- Amuitz
- Axalian tailer kreatiboa
- BANAKA
- Bale Urdina
- Canela
- ena
- Ittoitta
- KAPEN
- La Nueva
- Lohiart keramika
- Maore Sagarzazu
- Ongi Etorri
- Osoki
- wear banzai / Judas Arrieta
- 4eta2
