Ostiral honetan gabonetako zuhaitzaren argi eta musika ikuskizuna egingo dute
Ostiral honetan, hilaren 5ean, izango da lehenengo argi eta musika ikuskizuna Jenaro Etxeandia plazan, 19:00etan.
Nuria Alzaga eta Azahara Dominguez Jenaro Etxeandia plazan.Irungo Udala Jenaro Etxeandia plazako gabonetako zuhaitza eguberrietako berritasun nagusia izango da. Ostiral honetan, hilaren 5ean, argi jokoaren lehenengo proiekzioa egingo dute, 19:00etan. Zuhaitza erraldoia da, eta LED argiak eta proiekzio dinamikoak ditu. Gainera, jai hauetarako propio ondutako soinu-banda batek lagunduta egingo dute argi jokoa. Plaza goitik behera eraldatuko du eta merkataritzaren dinamizatzailea izango da.
Nuria Alzagak, Hiri Bultzadako eta Sustapen Ekonomikoko ordezkariak, gogoratu du urtero elementu berritzaileak ekartzen saiatzen direla. “Bisitariak erakarri nahi ditugu, Irun gabonetako helmuga izan dadin”. Bisitariak erakartzeko argi jokoa hainbat egunez egingo dute. Abenduaren 5ean, 6an, 7an, 12an eta 13an 19:00etan; eta 19tik urtarrilaren 6ra arte egunero, ordu berean.
