Kanpan eta Txanika Miamin lehiatuko dira
Pilotari hondarribiarrak Dania Beach Invitational zesta puntako txapelketan arituko dira. Txanikaren bigarren aldia izango da, eta Kanpanen lehenengoa, aurten debutatu baitu profesionaletan.
Txanika, Queiruga zinegotzia eta Kanpan. Miamirako hegaldiak prest dituzte jada Oier Kanpandegi Kanpan eta Julen Basterra Txanika pilotariek. Abenduaren 4an hasiko den zesta puntako Dania Beach Invitational txapelketan lehiatuko dira Hondarribiko Pilota Eskolako bi gazteak. 90 eguneko txapelketa izango da, beraz otsailera arte izango dira bertan bi hondarribiarrak.
Txanikaren bigarren urtea izango da lehiaketan. Iaz, final laurdenetakora iritsi zen. Atainekin batera osatu zuen bikotea, eta Tambourren eta Danelen aurka galdu zuten. Kanpanek, aldiz, aurten egin du debuta, Hondarribiko Grand Slamean. Finalerdietara iritsi zen.
Dania Beach Invitational txapelketa laugarren aldiz egingo dute oraingoan. Bertako frontoia, Estatu Batuetako erreferentea da zesta puntan, eta 22 pilotari arituko dira ostegunean hasten den txapelketan. Haietatik asko euskaldunak dira, eta Kanpan gazteenetakoa izango da.
