Iñigo Lavadok bere lehenengo Michelin Izarra jaso du
Sukaldari irundarrak maiatzean ireki zuen Itzuli jatetxea, Igeldon, hogei urtez Ficoban aritu ondoren. Jatetxeko lan talde osoaren lanaren ondorio da garaipena.
Atzo egin zen Michelin Izarren gala, Malagan (Espainia). Hartan, izar berriak banatu ziren. Badira hiru dituztenak, badira bi dituztenak eta badira bat daukatenak. Iñigo Lavado sukaldari irundarrak bere lehenengo Michelin Izarra jaso zuen atzo, Itzuli jatetxean egindako lanagatik. Maiatzean ireki zuen jatetxea, Igeldon, eta badirudi proiektuak fruituak eman dituela.
Txikitatik izan du gustuko sukaldaritza, eta gaztetan, lehen sukaldaritza ikasketak Luis Irizarren eskolan egin zituen. Hortik aurrera, munduko sukaldari onenen sukaldeetan aritu zen, hala nola Pedro Subijanarekin, Alain Ducassekin, Ferran Adriarekin edo Martín Berasategirekin. Donostian izan zuen bere lehen bizipena sukaldeko nagusi moduan, NH Aranzazu hoteleko Kukuarri jatetxean.
2005. urtean, Ficobako jatetxeko ardura hartu zuen, 20 urteko kontratuarekin. Urte askoz, maila altueneko sukaldaritzako Irungo erakusleiho handienetako bat izan zen, eta aurten, kontratua amaitzerakoan, Donostiara itzuli da Lavado.
Familia proiektua
Oso pozik agertu da sukaldaria sare sozialetan, bere lan talde guztiari eskerrak emanez. Lan talde barnean bere emaztea eta seme alabak daude, badirudi eta bere aitaren bidea jarraitu nahi dutela, ostalaritzari lotuta.
Michelin Izarra jaso duen Bidasoko bigarren sukaldaria da Lavado. Lehenengoa Gorka Txapartegi izan zen, 1997an, Alameda jatetxean egindako lanagatik. Oraindik, izarra mantentzen du hondarribiarrak.
