Greba astean daude Txinzerreko langileak
Enpresaren jarrera oztopatzailearen aurrean greba astea egiten ari dira langileak. Iragarri dute greba egun gehiago egingo dituztela egoerak berdin jarraitzen badu.
Aste osoa greban emango dute Txingudiko Zerbitzuakeko langileek. Azaroaren 10ean greba eguna izan zuten, eta ikusita negoziaketa errealik gabe jarraitzen dutela, aste osoko greba egingo dute, ELA sindikatuaren eskutik. Langileek adierazi dutenez, jarraipen “zabala” izan du oraingoz greba asteak.
Txinzerreko langile batzordeak argi du: enpresaren jarrera hasieratik negoziaketa atzeratzearen eta oztopatzearen aldekoa da. Langileek hitzarmenaren iraunaldirako KPIaren goitik dauden soldata igoerak, azken urteetan izandako eros ahalmena, enpresak hitzarmena aplikatzeari uztea ekiditen duten klausula eta bajak baldintzarik gabe osotasunean osatzea eskatzen dute, besteak beste. Horrez gain, ordutegien, egutegien, baimenen eta lizentzien inguruan hainbat aldarrikapen dituzte, eta baita ere azpikontratazioa mugatzea.
Astelehenean enpresaren aurrean egin zuten mobilizazioa, eta atzo asanblada bat burutu zuten. Gaur, Irunen eta Hondarribian zehar karabana informatiboak egin dituzte, eta 11:00etan elkarretaratzea egin dute Irungo Jendaurreko Arreta Bulegoaren aurrean. Bihar, Hondarribian Abotsanitzen egoitzaren aurrean egingo dute elkarretaratzea, eta ostiralean Irungo Udalaren aurrean.
Ez da amaitu
Ohar bidez, ELAk Irungo eta Hondarribiko udal gobernuei eskatu die Txinzerreko langileekiko errespetuz eta arduraz jokatzea, eta edukiz beteriko negoziaketa zintzo bat aurrera eramatea. Haien negoziaketa eskaerak bete arte hainbat greba deialdi egingo dituzte langileek abenduan eta azaroan zehar.
