Bilboko FIG azokan izango dira herriko bost artista
Maddalen Arte Gunearen izenean joango dira azokara, eta aukera paregabea izango dute haien lanak nazioarteko jende ezberdinaren aurrean erakusteko.
Arrieta, Goikoetxea, Cuesta eta Alonso. Maddalen Arte Gunea Bilbon izango da aste honetan, Euskalduna jauregian egingo den FIG azokan. Hondarribiko bost artistak erakutsiko dituzte haien lanak bertan. Naiara Goikoetxea, Julia Lasa, Aiert Alonso, Sandra Cuesta eta Judas Arrieta izango dira azokan. Bihar hasiko da FIG azoka, eta igande arte iraungo du.
Maddalen Arte Guneko komisarioa da Arrieta, eta adierazi du apirilean aurkeztu zutela FIG azokan parte hartzeko proiektua. Azokaren antolakuntzatik, hilabete batzuk beranduago jaso zuten erantzuna, proiektuaren onarpenarekin batera. “Poz handiarekin jaso genuen onarpena. Urte asko daramatza azokak funtzionamenduan, eta papereko artearen erakusleiho handi batean bilakatu da”, adierazi du Arrietak. Munduko toki ezberdinetako postuak egongo dira azokan, hau da, nazioarteko azoka da FIG.
Arrietak gogorarazi du hau soilik arte gunearen hasiera dela. “Gure helburua da hurrengo urteetan azoka honetara berriro joatea noski. Artista bakoitzak hamar lan inguruko jarriko ditu postuan, baina horrez gain, bakoitzak hainbat lan gehiago eramango ditu, bertan eskuragarri izateko. “Hondarribia Sormen Hiria proiektuari buruz ere informazioa emango dugu, eta artista bakoitzak gure dosierra eramango dugu”. Beste artistekin harremanak sortzeko aukera ere izango dute, sinergiak partekatzeko.
Ikasteko aukera paregabea da Goio Uriarte Kultur teknikariaren ustez. “Horrelako lekuetara joateak ikasteko aukera ematen digu. Gure ikusmira zabaltzeko eta gure txokotik ateratzeko modu ederra da. Beste eraginak jasotzea beharrezkoa izaten da”.
Komisario bila
Martxoan eman zitzaion hasiera Maddalen Arte Guneari. “Hondarribiko artistak saretzea izan dugu xede, horrela haien arteko harremanak sortzeko. Horrez gain, artistei ikusgarritasuna ematea funtsezkoa iruditzen zaigu”, azaldu du Ortzi Alonso Kultur zinegotziak. Hainbat ekitaldi egin dira oraingoz arte gunean, baina zinegotziak adierazi du beste puntu garrantzitsu bat gunea kanpora begira jartzea dela, eta horretarako FIG azoka aukera paregabea dela.
Alonsok gogorarazi nahi izan du 2026ko Maddalen Arte Gunearen komisariotzaren ardura hartzeko izen ematea zabalik dagoela. Abenduaren 1era arte apuntatu daiteke, proiektu bat aurkeztuz.
