Olinpiadak, berriro martxan
Hasi dira 2026ko Hondarribiko Olinpiadak. Lehen eguna larunbatean ospatu zuten, eta Berberiñak taldea izan zen garailea.
Berberiñak, larunbateko garaileak. Larunbatean hasi zituzten Hondarribiko Olinpiadak. Hirugarren belaunaldiko laugarren urtea dute honakoa, eta 36 taldek parte hartuko dute, 500 gazte inguruk. Festa giroan hasi zuten eguna, Amonan Txikhotia taldeak egindako sarrerarekin, haiek izan ziren eta aurreko urteko garaileak. Ondoren, hainbat joko txiki egin zituzten. “Lehenengo eguna denez, joko errazak egiten ditugu beti, oraindik ez dugu eta erritmoa hartu”, azaldu du Maider Miranda Komite Olinpikoko kideak. Baina edukiko dute erritmoa hartzeko denbora, ekainak 6 arte hilabetero proba bat egingo dute eta, guztira zortzi.
Aulkien jokoa, zaku lasterketa, izarra, mimika… haurtzaroan egindako jokoak errepikatu zituzten larunbatean. Bukatzerakoan, garaileak iragarri zituzten. Berberiñak izan da aurtengo lehen probaren garailea, eta bigarren postuan Amonan Txikhotia sailkatu zen. “Probak edo jolasak garrantzitsuak dira, noski, baina olinpiaden xedea herriko gazteak elkartzea da, eta gure artean giro ederra sortzea”, adierazi du Mirandak. Aurreko astean publikatu zuten aurtengo kartela, Eñaut Lazkanotegi herriko artistak egindakoa, eta bertan, adierazi zuten Olinpiadak “beharrezkoak direla, eta herriak Olinpiaden beharra” duela. “Turista gutxigo, eta Olinpiada gehio”, adierazi zuten antolatzaileek sare sozialetan.
Euskara oinarri
Hurrengo proba abenduaren 13an egingo dute. “Euskal Jaien harira, euskara proba egingo dugu. Olinpiadak badira, edo hori da behintzat gure asmoa, euskararen alde egiteko lekua. Horregatik, udaletik Euskal Jaien barruan gure proba bat sartzeko proposamena iritsi zitzaigunean, aurrera egin genuen”, azaldu du Mirandak. Horrela, portua auzoko kaleak euskal kulturaren eta folklorearen arlo ezberdinekin beteko dituzte. Musika, literatura, herri kirolak… denetarik izango dute.
Hona hemen larunbatean HITZAk ateratako argazkiak:
