Independentziara Eguna antolatu du Irungo Ernaik abenduaren 6rako
Eguna eskualdeko gazte independentisten topaleku izatea nahi dute, "jaiegun inposatuei" eta bestelakoei antolakuntza bidez aurre egiteko.
Urriaren 12an Irungo Ernaiko kideek San Martzial mendian egin zuten ekitaldikoa da irudia.Irungo Ernai Abenduaren 6rako Independentziara Eguna antolatu du Irungo Ernaik. Horren barruko ekitaldiak Irunen izango badira ere, eskualdeko gazteei dei egin diete horietan parte hartzera, “gazte independentisten topaleku” izaerakoa izango baita eguna. Beheko koadroan ikus daiteke egitarau osoa.
Irungo Ernaiko kideen arabera “abenduaren 6a bezalako jai egunak inposatu nahi badira ere, gazteak ez gara begira geratuko”, eta antolakuntzaz erantzuteko deia egin du. “Inposatutako mugetan kontrolak besterik jartzen ez dituzten bitartean, epaiez epai euskaraz bizitzeko eskubidea ukatu nahi duten bitartean, faxistak kaleak hartu nahian dabiltzan bitartean, Ernaik inoiz baino feminismo, euskara, antifaxismo eta batez ere independentismo gehiagorekin” erantzungo duela nabarmendu du.
Ernairen arabera, “Euskal Herria askatasunera eramatea da borroka hauek guztiak egikaritzeko bide bakarra eta beraz etorkizuneko Euskal Herria eraikitzeko bidea. Hori dela eta, inoiz baino gehiago ekiteko garaia da gazte independentistentzat”. Horregatik datorren abenduaren 6an zein aurrerantzean antolatutako jardueretan parte hartzera deitu dituzte gazteak.
Independentziara Eguna. Egitaraua.
- 19:00etan, Haziatik, Bixkor txaranga.
- 21:00etan, Peña kalean, ekitaldia.
- 21:30ean, Hazian, Guri Bo5t taldea.
- 22:30ean, Hazian, DJ Tostakis.
