Samina Agustin Ugarte hil delako
Behar Bidasoa gobernuz kanpoko erakundearen sortzaile izan zen, besteak beste, eta bere bizitzaren oinarri izan zuen beharra dutenak laguntzea.
Agustin Ugarte, Ruandako Kabugan. Ostiralean hil zen, 93 urte zituela, Agustin Ugarte Manterola. Behar Bidasoa gobernuz kanpoko erakundearen sortzaile izan zen, besteak beste, eta bere bizitzaren oinarri izan zuen beharra dutenak laguntzea. Irungo Udalak eta Behar Bidasoak samin mezuak zabaldu dituzte.
“Agustinek bere bizitza osoa eskaini zion besteei laguntzeari eta komunitateen arteko lankidetza loturak eraikitzeari. Bere konpromiso sozialak, pertsona desberdinak helburu komun baten inguruan elkartzeko gaitasunak eta gizatasun sakonak Behar Bidasoaren ibilbidea markatu zuten hasiera-hasieratik”, azaldu dute Behar Bidasoatik: “Erakundearen sortzaile eta presidente gisa, Agustin beti izan zen bultzada indarra eta konfiantza iturri bazkideentzat, boluntarioentzat eta kolaboratzaileentzat. Hainbat aldiz bidaiatu zuen Kabugara (Ruanda), proiektuen bilakaera bertatik bertara ezagutzeko, familiei entzuteko eta lankidetza lanaren eragina zuzen-zuzenean ikusteko. Hurbiltasunak eta pertsonen duintasunarekiko errespetu sendoak Behar Bidasoa gaur egun dena izatera eraman zuten”.
Egindako lanaren ordainetan, Irungo Urrezko Intsignia jaso zuen 2010ean, eta Gipuzkoako Foru Aldundiak bere izena daraman saria sortu zuen, nazioarteko lankidetzan egindako bizitza osoko lanari omenaldia eginez. Irungo Urrezko Domina jasotzeko ekitaldian herritarrei honakoa eskatu zien: “Mundu bidezkoago baten alde borrokatu eta sinetsi diferentziak errespetatuz, jarrera egoistak alde batera utziz, eta gure bizitzan txoko bat eginez beharrik handiena dutenei, gizaki gisa dagokien justiziazkoa emateko”.
Irungo Udalak ere samin hitzak izan ditu. Cristina Laborda alkatearen hitzetan, “Agustin ezinbesteko erreferentea izan da hirian, etengabeko konpromisoagatik eta laguntza gehien behar zutenei zuzendutako elkartasunagatik. Hiriaren goraipamenik handienarekin, Irungo Urrezko Intsigniarekin, kondekoratu zuten gainerakoei eskainitako dedikazioarengatik. Behar Bidasoan egindako lan handia alde batera utzita, Santiagoko Auzo Elkarteko presidente gisa, herritarren aktibismoak ere markatu zuen bere bizi-ibilbidea, eta, handik, udalarekin batera, hobekuntza garrantzitsuak bultzatu zituen auzoarentzat. Bere entrega eta begirada sakon gizatiarra funtsezkoak izan ziren lankidetzaren esparruan ere, bereziki Behar Bidasoaren bitartez, erakunde horretan aztarna ezabaezina utzi baitzuen”, gaineratu du alkateak.
