E29 lineak, 40.000 bidaiaritik gora bost hilabetean
Ekainaren 20an hasi zen martxan Hondarribia eta Irun, Donostiako ospitale nahiz Miramonekin lotzen dituen Lurraldebusen linea.
Agerraldia Irungo udaletxean egin dute.Gipuzkoako Foru Aldundia Hondarribia eta Irun, Donostiako ospitaleak eta Miramongo eremua lotzen ditu Lurraldebusen E29 lineak. Bost hilabete dira martxan jarri zutenetik, eta gaur emandako datuen arabera, 40.000 bidaiari baino gehiagoko izan dira autobus horietan joan-etorrian tarte horretan ekainaren 20tik; 42.363 denera: 23.545 Donostiranzkoan, eta 18.818 Hondarribiarako bidean. Urrian izan dituen lineak bidaiari gehien, 11.005 orotara. Azaroaren lehen 17 egunetan (ordura arteko datuak eman dituzte), 5.035 izan dira E29 erabili dutenak.
Funtzionamenduan dabilen lehen bost hilabeteetako balorazio kuantitatibo eta kualitatiboa emateko agerraldia egin dute gaur Irungo udaletxean Azahara Dominguez aldundiko Mugikortasun, Turismo eta Lurralde Antolaketa diputatuak, Cristina Laborda Irungo alkateak, Igor Enparan Hondarribiko alkateak. Haiekin batera izan dira Bidasoko Minbiziaren Aurkako Elkarteko, Irungo Auzo Elkarteen Federazioko, Makila elkarteko eta Osakidetzako langileen ordezkari sindikalak, autobusaren datuen berri emateko agerraldiaren aurretik politikariekin bilduta izan baitira haiek.
Datuak eskuan, erabiltzaileen kopuruaren joera “oso positiboa” dela uste du diputatuak. “Bat dator udako hilabeteetan Ospitalean gutxieneko kanpo-kontsultak izaten direla, baita langileak oporretan daudela ere. Baina ikasturtearen hasierarekin ikusten ari gara erabiltzaileen kopurua handitzen ari dela, eta horrek erakusten du beharrezkoa zela linea hori abian jartzea, biztanleriaren bi segmenturi ematen baitie zerbitzua nagusiki: Ospitalera joan behar duen biztanleria orokorrari eta ospitaleetako nahiz Miramongo teknologia-parkeko langileei”.
Irungo alkate Cristina Labordaren hitzetan, “urte askotako eskaera bati erantzuten zaio horrela, batez ere pazienteentzat eta senideentzat, baita inguru horretan lan egiten duten pertsonentzat ere, garraio publikoa sustatuz osasuna bezalako funtsezko gai batean. Irunek lotura onak ditu hiriburuarekin, baina linea horrek garraioa hobetzera etorri da, ospitalea eta enpresa-gune hori bezalako funtsezko zerbitzu batekin”.
Igor Enparan Hondarribiko alkateak esan du azken hilabeteetan E29 lineak izan duen hazkundeak argi erakusten duela herritarren behar errealei erantzuten diela: “Gure lehentasuna da ospitaletako eta Miramongo langileek, baita Hondarribiko bizilagunek ere, lanera zein osasun-zerbitzuetara iristeko aukera eroso, eraginkor eta segurua izatea. Mugikortasun publiko hobeak bizitza-kalitate handiagoa dakar, eta bide horretan lanean jarraituko dugu”. Enparanek eskerrak eman dizkio Aldundiari “egindako lanagatik eta erakutsitako prestutasunagatik”. “Hondarribiko Udaletik aldaketak eta hobekuntzak babesten jarraituko dugu, herritarren benetako premien neurrira egokitutako garraio publikoa izan dadin. Halaber, espero dugu Hondarribiko autobus-zerbitzuak guztiz bateragarriak izatea lotura honekin, ibilgailu pribatuen erabilera murrizteko eta mugikortasun jasangarriagoa sustatzeko tresna eraginkorra izan dadin”, zehaztu du.
Abenduaren 1etik, berritasunak
E29 lineak astelehenetik ostiralera ematen du zerbitzu. Zehazki, Hondarribitik abiatzen den autobusa 7:00etan abiatzen da (abenduaren 1etik aurrera 6:50ean) eta 08:10 eta 17:10 bitartean orduoro zerbitzu bat du (14:10ean izan ezik, orduan autobusak 14:00etara aurreratzen baitu irteera, langileen txanda-aldaketetara hobeto egokitzeko). Gainera, autobus bat dago 19:10ean eta beste bat 21:00etan.
Linea hau Ama Guadalupeko Ikastetxetik abiatzen da eta Sabino Arana, Amute eta Mendelu Kalean gelditu ondoren, Gurutze Gorritik sartzen da Irunera. Bertan zortzi geldialdi egiten ditu Kolon pasealekuan, Gipuzkoa etorbidean, Elizatxo hiribidean (lau geraleku) eta Letxunborron. Handik, G-20etik abiatzen da Gipuzkoako hiriburura, eta Loiolako Erriberatik sartzen da Donostian, ospitaleetara igotzen da, Poliklinikatik igarotzen da eta Mikeletegiraino iristen da, Miramongo parke teknologikoan. Alderantzizko ibilbidea honako hau da: Mikeletegi pasealekua, Miramon, Onkologikoa, Ospitaleak, Illunbe, Arcco, Toribio Alzaga eta Bartzelona etorbidea Donostian; Letxunborro, Elizatxo, Luis Mariano, Kolon eta Hondarribia kalea Irunen; eta Mendelu kalea, Amute, Aireportua (kanpoaldea), Sabino Arana eta Ama Guadalupekoa Ikastetxea Hondarribian. Ibilbide osoa, lehenengo eta azken geltokiaren artean, 45 minutukoa da.
