Autonomoek ere badaukate Gabonetako bazkaria
Gabon Topa egingo dute hirugarrenez abenduaren 19an, Bidasoko autonomoak elkartzeko.
Iazko Gabon Topa. Gabonetan enpresetako bazkariak eta afariak ohikoak dira jada. Baina badira otordu horietaz disfrutatzeko aukera ez dutenak, seguru aski autonomoak direlako. Horregatik, hirugarren urtez, Gabon Topa, Bidasoko autonomoen Gabonetako topaketa egingo dute, abenduaren 19an. Bidasoko autonomoek elkartzeko, haien bizipen profesionalez hitz egiteko eta bazkaltzeko aukera paregabea dute.
Antolatzaileek argi dute: Gabon Topa bazkari bat baino gehiago da. “Autonomo gisa partekatzen duguna ospatzeko modu bat da, urte osoko lanaren eta ahaleginaren ondoren. Elkarrekin gozatzeko, barre egiteko eta topa egiteko eguna da”. Haien ustez, autonomo moduan urtean zehar izandako esperientziak partekatzeko momentua da, eta denen artean ikasteko aukera aparta.
Poteoarekin hasiko dute eguna, 12:20ean, Hondarribiko Batzokian. Ondoren, 14:00etan, Pia Alkainek bisita gidatu bat eskainiko die bertaratutakoei. Hortik bazkaltzera joango dira segidan, Sugarri jatetxera. Postrearen ondoren, Gabonetako saskiak zozketatuko dituzte. Azkenik, aurten berritasun bat edukiko dute: DJa. Sugarri jatetxean bertan dantzaleku bat osatu eta bertan egongo dira autonomoak. 22:00etan kanapez osaturiko afaria izango dute, eta gauean parrandan jarraitu nahi duenak Itxaropena tabernako karaokea izango du eskuragarri.
Sarrerak Gabon Toparen atarian lor daitezke, 75 eurotan. “Ekitaldiaren prezioa 15 euro igo da aurten. Menuak gora egin du, ia sektore guztietan bezala, baina Gabon Toparen espirituari eutsi nahi izan diogu: egun osoko programa bat eskaini, ezustekorik gabe, dena barne. 75 euroren truke, esperientziak asko merezi du”, azaldu dute antolatzaileek.
