Velazquezek Hondarribian ezkontza bat antolatu zuenekoa, Pia Alkainen eskutik
Bisita birtual bat egingo dute ostiralean Kasino Zaharrean, 1660an egindako Luis XIV eta Maria Teresa Austriakoaren ezkontzaren xehetasunak azalduz.
Zumardikoak elkarteak Diego Velazquezek Hondarribiarekin izan zuen lotura azaltzeko, eta herrian eman zen ezkontza ospetsu bat ezagutzeko, bisita gidatu bat antolatu du, Pia Alkain historialariaren eskutik. Kasino Zaharrean egingo dute, ostiralean, hilak 21. Sarrera doakoa izango da, eta 18:30ean hasiko da.
Hondarribian izan zen Velazquez margolari ospetsua, bere azkenetariko enkargu bat egiten. 1660. urtean izan zen, eta Luis XIV eta Maria Teresa Austriakoaren ezkontza apaintzeko ardura eman zioten. Ezkontza hori, Hondarribiko parrokian ospatu zen, eta Frantziaren eta Espainiaren arteko bakea sinatzeko hitzarmenaren barnean ezarri zuten. Karlos V.aren gazteluan ostatatu zen Velazquez.
Felipe IV Espainiako erregearen alaba zen Maria Teresa Austriakoa. Velazquez Felipe IVren soldatapean zegoen, eta bere ardura izan zen ezkontzarako Faisaien irla atontzea, bertan sinatu baitziren ezkontza paperak eta bake hitzarmenak. Hiru aldiz ospatu zen ezkontza hura, bat Hondarribin, beste bat Faisaien irlan eta azkenekoa, Donibane Lohizunen.
Ziklo baten hasiera
Hitzaldia, ibilaldi birtuala, bisita… hainbat formatan erakutsiko dute 1660. urtean pasatakoa. Ez da jarduera bakarra izango, Zumardikoek azaldu dute eta ziklo baten barnean sartuko dutela ostiralekoa. Ziklo horren bidez, herriaren hazkundeari eta arkitekturari buruzko ibilaldi bat ondu nahi dute, beti ere Alkainen eskutik.
