"Berdintasunezko gizartea" irudikatzera deitu du Asun Casasola ipuin lehiaketak
Hamaikagarren edizioa aurkeztu dute gaur Parean elkarteko kideek eta Asun Casasola berak. Azaroaren 25ean zabalduko dute lanak aurkezteko epea.
Llorente, Ainara Maya, Asun Casasola, Maite Bergara eta Joana Ochoteco, gaurko aurkezpenean. Bueltan da Asun Casasola ipuin lehiaketa. Gaur egin dute hamaikagarren edizioaren aurkezpena, Nagore Laffage parkean, haren ama Asun Casasola bertan zegoelarik. Parean elkarteko Oihana Llorentek eman ditu aurtengoaren xehetasunak. Urtero bezala, berdintasuna aldarrikatuko duten hamaika istorio bildu nahi dituzte. “Azaroaren 25a gainean dugula, edizio berri bat martxan jarri dugu, hitzen bidez indarkeria matxistarik gabeko gizartea aldarrikatzeko”, aipatu du Llorentek. Horrez gain, lehiaketaren “motorra eta hari” den Asun Casasolaren aldeko borroka ere omendu nahi du egitasmo honek.
Aurrekoetan bezalaxe, bi kategoria izango dira: helduak eta 0-16 urtekoak. Euskaraz gain, gazstelaniaz ere idatzi daitezke ipuinak. “Aurten ipuinen gaia librea izango da baina lehiaketaren izaera mantentzeko xedearekin, genero indarkeriaren kontrako borroka ikuspuntu positibo batetik islatzen duten idazkiak bilatzen ditugu”, erantsi du Parean-eko kideak. “Emakume eta gizonen arteko berdintasunezko gizarte hori irudikatzera gonbidatzen ditugu partaideak”.
Kategoria bakoitzeko sari bat egongo da. 16 urtetik gorako lan onenak 300 euro jasoko ditu; 0-16 bitarteko onenak, berriz, 100 euroko saria jasoko du. Katakrak liburudendak emandako liburu sorta bat ere jasoko dute lan onenen egileek. Honako epaileek baloratuko dituzte lanak: Yurre Ugarte, Ainara Zuazabeitia eta Aitziber Zapirain arduratuko dira euskarazko helduen lanak baloratzeaz; Mertxe Trantxe, Maria Jose Noain eta Marian Benitez helduen gaztelaniazko epaileak izango dira; gazteen euskarazko lanak Itziar Gomez, Ainara Maya eta Ester Lopezek baloratuko dituzte; eta azkenik, Noelia Lorenzo, Maite Bergara eta Naroa Gonzalez gaztelaniazko gazteen lanak epaituko dituzte.
Azaroaren 25ean (asteartean da) zabalduko dute lanak aurkezteko epea. Hauek helbide honetara bidali beharko dira, otsailaren 8a baino lehen. Orduan hasiko da epaileen lana. Martxoan (M8aren bueltan) iragarriko dituzte saridunak.
Gazteen parte hartzean eta bereziki euskarazko lanetan jarri dute fokua aurten ere. “Iaz parte hartzea asko handitu zen orokorrean. Gazteek 500dik gora ipuin bildu zituzten. Aurten bdie beretik jo nahi dugu, euskarazko kategorian esfortzu gehienak jarrita”, erantsi du Llorentek.
