2,5 hektareatan handitu dute Jaizubiko padura
Berreskuratze lanak egin ditu aldundiak, bertako flora eta fauna areagotzeko eta uholde arriskua txikiarazteko xedearekin.
Enparan eta Mendoza, Aitor Lekuona eta Xabier Arrutirekin batera. Amaitutzat eman ditu Gipuzkoako Foru Aldundiak Jaizubiko paduratan egindako handiagotzea. Duela 30 urte inguru hasi ziren Jaizubia errekaren alboko padurak berreskuratzen, eta hasieran lan handia egin ondoren, 25 urtez geldituta egon da proiektua. Azkenean, aurten, beste eremu bat hartu eta paduraren barnean sartu dute, Beko Errota jatetxearen alboan dagoena. Aurreko ostiralean eman zuten albistearen berri Eider Mendoza Gipuzkoako diputatu nagusiak eta Igor Enparan alkateak.
Mendozak azaldu zuenez, bi helburu nagusi izan ditu aldundiak azken esku hartzean: “Alde batetik, leheneratze lanak izan dira, lehenago bertan zegoena berreskuratzeko saiakera. Bestetik, lehenago bertan zeuden lur artifizialek mareak oztopatzen zituzten, eta horrek arazoak sor ditzake”. 2,5 hektareako eremua irabazi du itsasoak orain, eta hori aurrerapauso bat da instituzioen ustez, Mendelun eta Jaizubian daude uholde arazoak ikusita.
780.000 euroko aurrekontu batekin hasi ziren lanak udaberrian, eta Mendozaren ustez helburuak “erabat” bete dira, eta gainera, haratago joan da proiektua: “Gure helburuak bete egin ditugu, eta gainera, naturalki, hainbat putzu sortu dira, horrela apo lasterkaria ere areagotuz”. Biodibertsitatearen aldeko borrokan oinarritu du aldundiak Jaizubiko paduran egindako berreskuratze lana, eta baita klima larrialdiarekin lotuta ere. “Hurrengo belaunaldiei begira, horrelako egitasmoak garatzea oso garrantzitsua da, haiek ere mundu berde batez goza dezaten”, azaldu du Mendozak.
Bertako flora eta fauna berreskuratzeko, lurra mugitu eta gizakiak sortutako lurrak eraitsi egin dituzte, hala nola, munak. Gainera, bertako landareak landatu dituzte, besteak beste tamarindoak, intsusak, haritzak eta elorri zuriak. Jada, udazkenean, hainbat txori izan dira berreskuratutako eremuan, heian artean beltzaran arrunta eta mokozabal arrunta. “Zorte bat da hondarribiarrentzat horrelako leku bat gure herrian edukitzea, baina gure ardura da ere hori bera zaintzea”, azaldu du Enparanek.
Aurrera begira
Hurrengo pausua San Pablo padura berreskuratzea eta garbitzea izango da. Egun, lezoi batek inguratuta ez du itsasoaren mareak uzten sartzen, soilik euriak eragindako gehiegizko ura drainatzeko sistema bat dauka. Horretarako, duela zenbait hilabete Natur kontserbaziorako LIFE hezeguneen programara aurkeztu zuten proiektua, eta onartu ondoren, 1,4 milioi euroko partida bat jasotzea espero du aldundiak.
