Sutea piztu da goizean goiz Higer inguruan
Hogei bat etxebizitza eta kanpina hustu behar izan dituzte. Suhiltzaileek adierazi dute kontrolpean dutela egoera. Eider Mendozak adierazi du hirugarren mailako sutea izan dela.
Sua piztu da Higer aldean, 06:00ak aldera. Inguruko bizilagunen ustez, linea elektrikoak eragindako txinparta batek sortu du sutea, eta haize bolada handiek zabaltzen lagundu dute. Halere, oraindik ez da bertsio ofizialik eman, sutearen zergatiak argitzeko. Hogei etxebizitza inguru hustu behar izan dituzte. suak zuen arriskua dela eta. Horrez gain, itsasargiaren alboan dagoen kanpineko jendea bertatik atera dute. Suhiltzaileek adierazi dute sua kontrolpean dutela, baina haizeteak itzaltze lanak zaildu egiten dituela.
Goizean egindako agerraldi batean suteaz mintzatu da Eider Mendoza Gipuzkoako diputatu nagusia. “5:55ean jaso dugu lehen abisua, eta hirugarren mailako sutea izan den arren, esan dezakegu orain kontrolpean dagoela. Pertsona askok hartu dute parte sutea itzaltzen, eta haiei eskerra ematea beharrezkoa da”. Mendozak adierazi du ez dela kalte pertsonalik izan, ezta zauriturik ere.
Egoera horren aurrean, Igor Enparan Hondarribiko alkateak agerraldia egin du, eta jakinarazi du mandu postuan egoteko aukera izan duela “lehen ordutik”. Gauzak horrela, baieztatu du sutea piztu bezain pronto kudeatu behar izan dela pertsonen segurtasuna bermatze aldera. Ehiza postuetako zozketa eremuan piztu dela sutea dio Enparanek, eta, hortaz, han zeuden pertsonak “modu seguruan” atera dituztela eremu horretatik. Are, gehitu du kanpin inguruko etxebizitza batzuetako pertsona batzuk ere atera behar izan dituztela.
Era berean, nabarmendu du sutea neurri batean “bideratuta eta kontrolatuta” dagoela, eta, orain, eremuaren hozte lanetan ari direla. Ildo horretatik, alkateak dio sutea “larria” izen dela, batik bat, pertsonak zeuden eremuan izan delako eta “oso azkar” zabaldu delako. Alabaina, azpimarratu du segurtasun alorreko hamaika langile buru belarri aritu direla lanean lehen ordutik eta “kristoren esfortzua”egin dutela sutea lehen bai lehen kontrolpean izateko. “Sutea neurri batean kontrolpean izateak egindako esfortzuari erantzuten dio”.
Bide horretan, Enparanek langileek egindako lanketa goraipatu du. Dio herritarrek euren etxeetara bueltatzeko aukera izango dutela goizean zehar, eta horrek adierazten duela “egoera bideratu dela nahiz eta haize bolada hauek irauten duen bitartean nolabaiteko larrialdi egoera hori indarrean egongo den eremua guztiz hozten den arte”.
Ondorioz, alkateak dio “alertan” mantenduko direla, eta langileak ere bertan egongo direla. “Espero dezagun gaur egunean zehar egoera kontrolpean izatetik sutea behin betikotzat itzalita deklaratuta izatea eta pertsonek inolako kalterik ez izatea”, amaitu du hitzartzea.
